ગુજરાત ભાજપનો એક નિર્ણય અને કેટલાય કોર્પોરેટરોના ચહેરા પર ખુશી આવી ગઇ. તો કેટલાક રિપીટ થવાની રાહમાં રહેલા પદાધિકારીઓની આશા ધૂળધાણી થઇ ગઇ. ગુજરાત પ્રદેશ ભાજપના અધ્યક્ષ સી.આર.પાટીલે આગામી પાલિકા અને કોર્પોરેશનમાં નિમણૂકમાં નો-રિપીટ થિયરીની જાહેરાત કરી છે. આ નિર્ણયથી વધુથી વધુ લોકોને તક મળશે. સામાન્ય બેઠક પર સામાન્ય વર્ગમાંથી આવતા લોકોને પ્રાયોરિટી અપાશે. દરેક કાર્યકરની સિનિયોરિટી, આવડત, આક્ષેપ વગેરેને ધ્યાનમાં લેવાશે. તથા કાર્યકર વિરુદ્ધ થયેલા આક્ષેપની ચકાસણી કરવામાં આવશે. પ્રદેશ ભાજપના નિર્ણયથી હવે મેયર, સ્ટેન્ડિંગ ચેરમેન સહિતના પદ માટે દાવેદારોમાં ઉત્સાહનો માહોલ જોવા મળી રહ્યો છે.

અમદાવાદમાં મહિલા મેયર માટે દાવેદાર ગીતાબેન પટેલ રેસમાંથી બહાર
નો રિપીટ થિયરીના પગલે હવે અમદાવાદ મનપામાં મહિલા મેયર તરીકે સૌથી સિનિયર મહિલા કોર્પોરેટર અને હાલના ડેપ્યુટી મેયર ગીતાબેન પટેલ રેસમાંથી બહાર નીકળી ગયા છે. સ્ટેન્ડિંગ કમિટીના ચેરમેન હિતેશ બારોટ અને શાસક પક્ષના નેતા ભાસ્કર ભટ્ટ બંને ચેરમેન પદના દાવેદાર હતા પરંતુ નો રિપીટ થિયરીના પગલે હવે તેઓને ફરી રિપીટ કરાશે નહિ. તો નવા બનેલા કોર્પોરેટરોમાં ઉત્સાહનો માહોલ જોવા મળી રહ્યો છે.

પાટીદાર મહિલાની મેયર તરીકે પસંદગી થવાની શક્યતા
હવે સ્ટેન્ડિંગ કમિટીના ચેરમેન પદના દાવેદાર તરીકે ઘાટલોડિયા વોર્ડના કોર્પોરેટર અને વોટર સપ્લાય કમિટિના ચેરમેન જતીન પટેલ અને રોડ એન્ડ બિલ્ડિંગ કમિટીના ચેરમેન મહાદેવ દેસાઈની દાવેદારી મજબૂત બની છે. જોકે કોઈ અન્ય સિનિયર કોર્પોરેટરને પણ સ્ટેન્ડિંગ કમિટિના ચેરમેન તરીકે બેસાડવામાં આવી શકે છે. જ્યારે મેયર તરીકે કોઈ પાટીદાર મહિલાને મેયર તરીકે મુકવામાં આવી શકે છે. જો પાટીદાર મહિલા મેયર તરીકે બેસાડવામાં આવશે તો સ્ટેન્ડિંગ કમિટિના ચેરમેન તરીકે OBC કોર્પોરેટરની પસંદગી થવાની શક્યતા છે. અથવા બંને જગ્યાએ સામાન્ય વર્ગના જ કોર્પોરેટરને નિમણૂક કરવામાં આવી શકે છે. શાસક પક્ષના નેતા તરીકે પણ નવા કોર્પોરેટરને તક મળી શકે છે.

રાજકોટના 22માં મેયર તરીકે નિયુક્તિ માટે કાઉન્ટ ડાઉન શરૂ
તો રાજકોટ શહેરના 22માં મેયર તરીકે નિયુક્તિ માટે કાઉન્ટ ડાઉન શરૂ થઇ ચૂક્યું છે. મેયર પદ માટે મહિલા અનામત હોવાથી 6 જેટલા નામો ચર્ચામાં છે. જયારે સ્ટેન્ડિંગ ચેરમેન માટે પણ 6 નામો ચર્ચાઇ રહ્યા છે. જોકે એક વાત એવી પણ હતી કે વર્તમાન મેયર નિર્વિવાદિત હોવાથી સ્ટેન્ડિંગ કમિટી ચેરમેન માટે ભલામણ થઇ છે. પરંતુ હવે સી.આર.પાટીલની નો-રિપીટ થિયરીની જાહેરાતથી આ ચર્ચાને પૂર્ણવિરામ લાગી ગયું છે. આ બધા વચ્ચે ભાજપ દ્વારા ચર્ચાતા નામોમાંથી કોઈ એકની પસંદગી કરશે કે પછી શહેર ભાજપના પ્રમુખ નામની જેમ મેયરના નામમાં પણ સરપ્રાઇઝ આપશે તે જોવું મહત્વનું રહેશે.

રાજકોટમાં સ્ટેન્ડિંગ કમિટીના ચેરમેન માટે 6 નામો ચર્ચામાં
રાજકોટમાં મેયર પદ માટે ચર્ચાતા 6 નામોમાં હાલ ડૉ.દર્શનાબેન પંડ્યા, જ્યોત્સનાબેન ટીલાળા, નયનાબેન પેઢડિયા, ભારતીબેન પરસાણા, વર્ષાબેન રાણપરા અને પ્રીતિબેન દોશીનું નામ ચર્ચાઈ રહ્યું છે. જ્યારે સ્ટેન્ડિંગ કમિટીના ચેરમેન માટે મનીષ રાડિયા, જયમીન ઠાકર, નેહલ શુક્લ, દેવાંગ માંકડ, અશ્વિન પાંભર અને ચેતન સુરેજાના નામો ચર્ચાઇ રહ્યા છે. જયારે ડેપ્યુટી મેયર માટે નીતિન રામાણી, ડૉ. અલ્‍પેશ મોરઝરીયા, અને પરેશભાઇ પીપળીયાના નામો ચર્ચાઈ રહ્યા છે. આ સાથે શાસક પક્ષ નેતાના પદ માટે બાબુભાઇ ઉધરેજા, નિલેશ જલુ, નરેન્દ્રસિંહ જાડેજા અને કેતન પટેલનું નામ ચર્ચાઈ રહ્યું છે.

સુરતમાં નવા ચહેરાઓને તક મળશે
​​​​​​​સુરત મનપામાં સિનિયોરિટીને આધારે પદ અપાય તેવી ચર્ચા થઇ રહી છે. બેકે તેથી વધુ વખત કોર્પોરેટર રહી ચૂક્યા હોય અને વર્તમાન ટર્મમાં કોઈ પદ ઉપર ન હોય તેવા ચહેરાઓને તક મળશે. સાથે સાથે યુવા ચહેરાઓમાંથી પણ એકાદ મોટું પદ આપી દેવામાં આવે તો નવાઈ નહીં. જોકે સુરતમાં જ્યારે નિરીક્ષકો સાંભળવા આવ્યા હતા ત્યારે તેમની આગળ પણ વર્તમાન મહત્વના પદ ઉપર રહેલા પદાધિકારીઓને ફરીથી રિપીટ કરવામાં ન આવે તેવી પણ રજૂઆત કરવામાં આવી હતી. અને નવા ચહેરાઓને સ્થાન આપવામાં આવવું જોઈએ તેવી પણ રજૂઆત થઈ હતી. આખરે નો-રિપીટનો નિર્ણય લેવાતા કોર્પોરેટરોમાં ઉત્સાહનો માહોલ જોવા મળી રહ્યો છે.

વડોદરામાં હોદ્દા માટે દાવેદારોએ એડીચોટીનું જોર લગાવ્યું
વડોદરા મનપામાં મેયર, ડેપ્યુટી મેયર અને સ્ટેન્ડિંગ ચેરમેનના હોદ્દા માટે દાવેદારોએ એડીચોટીનું જોર લગાવી દીધું છે. છેલ્લી ઘડીએ અણધાર્યા નામો આપવા માટે ટેવાયેલી ભાજપા આ વખતે પણ ચોકાવશે કે પછી જે કાઉન્સિલરોના વિવિધ હોદ્દા માટે નામો ચાલે છે તેમાંથી જ કોઈને હોદ્દો આપશે તે રહસ્ય છે. શહેર ભાજપમાં હાલ કોણ મેયર બનશે અને કોણ ડેપ્યુટી મેયર બનશે તે અંગે ચર્ચાઓએ જોર પકડ્યું છે.