ગોંડલ શહેરના દેવપરા વિસ્તારમાં આવેલી સંયુક્ત મિલ્કતમાં કાકા અને ફૈબાનો હિસ્સો ડુબાડી  સીધી લીટીના વારસદાર તરીકેનું ખોટું સોગંદનામું નોટરાઇઝ કરી જેના આધારે સીટી સર્વેમાં નોંધ પડાવી મિલકતને પોતાના નામે કરાવી લીધા બાદ અન્ય વ્યક્તિને કબ્જા રહીત સાટાખત કરી છેતરપિંડી આચર્યાની પિતરાઇ ભાઇ સામે સીટી પોલીસ મથકમાં ફરિયાદ થઈ છે.

પ્રાપ્ત વિગત મુજબ ગોંડલ ના દેવપરા શેરી નં.૨માં રહેતા જયપ્રકાશભાઇ લક્ષ્?મીચંદભાઇ ઉર્ફે લક્ષ્?મીદાસ ઉદેશીએ  કરેલી ફરિયાદમાં ગોંડલના પંચનાથ પ્લોટમાં રહેતા મહેન્દ્ર જમનાદાસ ઉદેશીએ  પારિવારિક સંયુકત મિલ્કતમાં હક્ક ડુબાડવા ખોટુ સોગંદનામું બનાવી તેનો ખરા તરીકે ઉપયોગ કરી રેવન્યુ રેકર્ડમાં નોંધ કરાવી કાકા અને ફૈબા સાથે છેતરપિંડી કર્યાની ફરિયાદ નોંધાવી છે. પોલીસની પ્રાથમિક તપાસમાં જયપ્રકાશભાઇના દાદી અને ભાભુના નામની મજમુ મિલ્કત આવેલી છે. આ મિલ્કતમાં ફરિયાદીના પિતા લક્ષ્મીચંદભાઇ, ભાભુ કમળાબેન અને ફૈબા રતનબેન સહિત ત્રણેય સીધી લીટીના વારસદાર હોવાથી ત્રણેયનો હિસ્સો છે.

આ મિલ્કતમાં જયપ્રકાશભાઇ સહિતના ભાઇ-બહેનનો હિસ્સો હોવાનું જાણતા હોવા છતા મોટાબાપુના પુત્ર મહેન્દ્રભાઇએ ગત તા.૭/૪/૨૨ના રોજ પિતા લક્ષ્મીચંદભાઇ અને ફઇ રતનબેનનું વારસદારમાં નામ નહીં દર્શાવી ખોટુ સોગંદનામું બનાવી નોટરાઇઝ કરી તેનો ખરા તરીકે ઉપયોગ કર્યો હતો. એ પછી સીટી સર્વે કચેરી  ખાતે રજૂ કરી મિલ્કત વારસાઇ એન્ટ્રી કરાવી તેના ભાઇ અને બહેનોના નામે સહદેવસિંહ મહેન્દ્રસિંહ જાડેજાને  સબ રજીસ્ટાર કચેરીમાં કબ્જા રહિત સાટાખત કરાવી આપ્યું હતું. ઉપરોક્ત સોગંદનામા પિતા અને ફૈબાનો હિસ્સો ડુબાડી પોતાના નામે કરી છેતરપિંડી કર્યાની ફરિયાદ નોંધાવી છે.