ફોર્બ્સની 100 સૌથી શક્તિશાળી મહિલાઓની યાદીમાં ભારતીય મૂળની ચાર મહિલાઓએ પણ સ્થાન મેળવ્યું છે. આ યાદીમાં કેન્દ્રીય નાણામંત્રી નિર્મલા સીતારમણ 32મા સ્થાને છે.

યાદીમાં અન્ય ત્રણ ભારતીય મહિલાઓમાં HCL કોર્પોરેશનના સીઈઓ રોશની નાદર મલ્હોત્રા (60મો રેન્ક), સ્ટીલ ઓથોરિટી ઓફ ઈન્ડિયાના ચેરપર્સન સોમા મંડલ (70મો રેન્ક) અને બાયોકોનના સ્થાપક કિરણ મઝુમદાર-શો (76મો રેન્ક)નો સમાવેશ થાય છે.

આ યાદીમાં નિર્મલા સીતારમને સતત પાંચમી વખત સ્થાન મેળવ્યું છે. ગયા વર્ષે તે આ યાદીમાં 36મા ક્રમે હતી. એટલે કે આ વખતે તે 4 સ્થાન ઉપર છે. જ્યારે 2021માં તેને 37મું સ્થાન મળ્યું હતું.

યુરોપિયન કમિશનના વડા ઉર્સુલા વોન ડેર લેયેન ટોચ પર

યુરોપિયન કમિશનના વડા ઉર્સુલા વોન ડેર લેયેન ફોર્બ્સની શક્તિશાળી મહિલાઓની વાર્ષિક યાદીમાં ટોચ પર છે. તેમના પછી યુરોપીયન સેન્ટ્રલ બેંકના બોસ ક્રિસ્ટીન લેગાર્ડ બીજા સ્થાને અને અમેરિકાના ઉપપ્રમુખ કમલ હેરિસ ત્રીજા સ્થાને છે.

દર વર્ષે યાદી બહાર પાડવામાં આવે છે

દર વર્ષે અમેરિકન બિઝનેસ મેગેઝિન વિશ્વની 100 સૌથી શક્તિશાળી મહિલાઓની યાદી બહાર પાડે છે. ફોર્બ્સ અનુસાર તે ચાર મુખ્ય મેટ્રિક્સના આધારે રેન્કિંગ નક્કી કરે છે: પૈસા, મીડિયા, અસર અને પ્રભાવનો ક્ષેત્ર.

રાજકીય નેતાઓ માટે, મેગેઝિને જીડીપી અને વસ્તીને માપદંડો તરીકે લીધા છે, જ્યારે કોર્પોરેટ નેતાઓ માટે, તેણે આવક, મૂલ્યાંકન અને કર્મચારીઓની સંખ્યા લીધી છે.