તાતા જૂથની માલિકીની ઍર ઇન્ડિયાની પ્રથમ નવું A350-900 સીરીઝની એરબસ ગત 23 ડિસેમ્બર, 2023ના રોજ ફ્રાન્સના તુલોઝથી સંપૂર્ણ સુવિધા સાથે ઉડાન ભરીને દિલ્હી ઍરપોર્ટ પર ઊતર્યું હતું. આ વિમાન હવે ગત 22 જાન્યુઆરીના રોજ કોમર્શિયલ સર્વિસમાં પ્રવેશ કરી ચૂક્યું છે. ભારતમાં ત્રણ ઍરક્રાફ્ટની ડિલિવરી પણ શરૂ થઇ ગઇ છે. હવે દર મહિને એક-બે વિમાનો આવશે. દરમિયાન અમદાવાદથી લંડન જનારા મુસાફરો માટે પણ સુખદ સમાચાર છે કે ઍર ઇન્ડિયા લંડનના ગેટવીક રૂટ પરથી A350-900 સીરિઝનું ઍરક્રાફ્ટ ઓપરેટ કરશે. હાલ ઍર ઇન્ડિયા આ રૂટ પર 256 મુસાફરોની ક્ષમતા ધરાવતું 787 ડ્રીમ લાઇનર ઓપરેટ કરે છે. આ વિમાનમાં ફક્ત 18 બિઝનેસ ક્લાસ સાથે 238 ઇકોનોમી ક્લાસ સીટ છે. જોકે તેમાં મુસાફરો માટે લકઝુરિયસ સીટની પણ સુવિધા નથી.

બિઝનેસ સ્યૂટ સાથે આરામદાયક મુસાફરીનો લાભ લઈ શકાશે

હવે એર ઇન્ડિયા દ્વારા આગામી સમયમાં આવનારા નવી સીરિઝના 316 સીટર ઍરક્રાફ્ટમાં મુસાફરો 9 કલાકના અંતરમાં પ્રાઇવેટ બિઝનેસ સ્યુટ સાથે આરામદાયક મુસાફરીનો લાભ લઈ શકશે. અમદાવાદથી લંડન જતા મુસાફરોને આગામી 6 મહિનામાં જ આ નવા ઍરક્રાફટની સુવિધા મળશે. બીજી તરફ ઍર ઇન્ડિયાના જૂના ડ્રીમ લાઇનર વિમાનને વારાફરથી અપગ્રેડ કરવાની કામગીરી શરૂ કરાઇ છે. આમ, હવે લંડન જતા મુસાફરોને વધુ એક સુવિધા મળશે.

350 એરક્રાફ્ટની વિશેષતા

• 316 બેઠક સાથે ફ્લાઇટમાં થ્રિ-કલાસ કેબિન
• 28 પ્રાઇવેટ બેડ સાથે બિઝનેસ ક્લાસ સ્યુટ
• 24 પ્રીમિયમ ઇકોનોમી સીટ સાથે વધારાનો લેગરૂમ
• 264 ઇકોનોમી સીટોનો પણ સમાવેશ

લંડન માટે 8207 કિલોમીટરનું અંતર કાપવામાં 9.40 કલાકનો સમય લાગે છે

અમદાવાદથી લંડનના ગેટવીક ઍરપોર્ટ પર 8207 કિ.મી.નું અંતર કાપવામાં હાલ 9.40 કલાકનો સમય લાગે છે. આ ફલાઇટ સપ્તાહમાં મંગળ, ગુરુ અને શનિ એમ ત્રણ દિવસ બપોરે 1:10 વાગે અને લંડનના સમય મુજબ સાંજે 5:20 કલાકે ઓપરેટ થાય છે.

અમદાવાદમાં ગત પાંચમી જાન્યુઆરીએ A-350 વિમાન લેન્ડ થયું હતું

આગામી સમયમાં નવા સીરિઝના વિમાનને અમદાવાદથી ઓપરેટ કરવા ઍર ઇન્ડિયાએ પેસેન્જર વિના ટેસ્ટ ફ્લાઇટ કરી હતી. ગત 5 જાન્યુઆરીના રોજ દિલ્હીથી અમદાવાદ ઍરપોર્ટ પર સાંજે 5:35 કલાકે A350 સીરિઝનું વિમાન સફળ રીતે લેન્ડ થયું હતું. જોકે આ ફ્લાઇટ દિલ્હી માટે રવાના થાય તે પહેલા જ સેન્સરમાં ખામી સર્જાતા તેને ગ્રાઉન્ડ કરવું પડ્યું હતું. આ કારણસર ઍર ઇન્ડિયાના અધિકારીઓમાં પણ દોડધામ મચી ગઈ હતી.