સ્પેન 12 વર્ષ બાદ યુરો કપની ફાઈનલમાં પહોંચ્યું છે. મંગળવારે જર્મનીના બર્લિનના આલિયાન્ઝ એરેના ખાતે રમાયેલી પ્રથમ સેમિફાઈનલમાં જર્મનીએ ફ્રાન્સને 2-1થી હરાવ્યું હતું.

હવે ફાઈનલમાં તેનો મુકાબલો રવિવારે ઇંગ્લેન્ડ અને નેધરલેન્ડ્સ વચ્ચે યોજાનારી બીજી સેમિફાઈનલમાં વિજેતા ટીમ સાથે થશે. આ પહેલાં સ્પેન 2012માં ઈટાલીને હરાવીને ફાઈનલમાં પહોંચ્યું હતું.

સ્પેનની જીતના હીરો 16 વર્ષીય લેમિન યામલ અને ડેની ઓલ્મો હતા. બંનેએ ટીમ માટે 1-1 ગોલ કર્યા હતા. ફ્રાન્સે મેચની પ્રથમ 10 મિનિટમાં ગોલ કરીને લીડ મેળવી લીધી હતી, પરંતુ 15 મિનિટ બાદ સ્પેને પ્રથમ ગોલ કરીને સ્કોર બરાબરી કરી દીધો હતો અને માત્ર 4 મિનિટ બાદ જ બીજો ગોલ કરીને આગળ થઈ ગયું હતું.

ફ્રાન્સે 10 મિનિટમાં જ ગોલ કર્યો

મેચના પહેલા હાફમાં જ બંને ટીમે મળીને ત્રણ ગોલ કર્યા હતા. મેચની 7મી મિનિટે ફ્રાન્સના કેપ્ટન કાઇલિયન એમબાપ્પેએ ગોલ કરવાનો પ્રયાસ કર્યો હતો, પરંતુ તે ગોલ પોસ્ટ સુધી પહોંચે તે પહેલાં જિસસ નાવાસે તેની પાસેથી બોલ છીનવી લીધો હતો.

માત્ર બે મિનિટ પછી, એમ્બાપ્પે પાસે બોલ હતો, તેણે કોઈ પણ વિલંબ કર્યા વિના તેને તેની ટીમના સાથી પાસે પાસ કર્યો અને કોલો મુઆનીએ કોઈ ભૂલ કરી નહીં અને ટીમને 1-0ની લીડ અપાવી.

ફ્રાંસની ટીમ અને તેના પ્રશંસકોની ખુશી લાંબો સમય ટકી ન હતી, માત્ર 15 મિનિટ બાદ સ્પેને સ્કોર બરાબરી કરી દીધો હતો. મેચની 21મી મિનિટે 16 વર્ષીય લેમિન યામાલે ગોલ કરીને સ્કોર 1-1ની બરાબરી પર લાવી દીધો હતો. બરાબર 4 મિનિટ બાદ એટલે કે 25મી મિનિટે ડેની ઓલ્મોએ ગોલ કરીને ટીમને 2-1થી આગળ કરી દીધી હતી.

પ્રથમ હાફમાં 2-1થી આગળ ચાલી રહેલા સ્પેનિશ ખેલાડીઓનું મનોબળ બીજા હાફમાં પણ અકબંધ રહ્યું હતું. સ્પેનિશ ટીમે ફ્રેન્ચ ડિફેન્સ પર પ્રભુત્વ જમાવ્યું હતું.

જોકે, મેચની 60મી મિનિટે ફ્રાન્સના ઓસમાન ડેમ્બેલે ક્રોસ શોટથી સ્કોર બરાબરી કરવાનો પ્રયાસ કર્યો હતો, પરંતુ તેના પ્રયાસને સ્પેનના ગોલકીપર ઉનાઈ સિમોને નિષ્ફળ બનાવ્યો હતો. સ્પેનની લીડ અંતમાં અકબંધ રહી અને ટીમે 2-1થી મેચ જીતી લીધી.