હવામાન વિભા દ્વારા આગામી અઠવાડિયામાં રાજ્યમાં વરસાદની આગાહી વ્યક્ત કરવામાં આવી છે. એમાં આજે (3 ઓગસ્ટ) દક્ષિણ ગુજરાતના સુરત, નવસારી, વલસાડ, દમણ તેમજ દાદરા અને નગર-હવેલીમાં રેડ એલર્ટ સાથે ભારે વરસાદની આગાહી કરવામાં આવી છે. આ ઉપરાંત રાજ્યમાં બનાસકાંઠા, સાબરકાંઠા, અરવલ્લી, દાહોદ, મહીસાગર, ખેડા, ભરૂચ, તાપી, અમદાવાદ, આણંદ, વડોદરા, ડાંગ અને છોટાઉદેપુરમાં પણ ભારે વરસાદની આગાહી કરવામાં આવી છે.

હવામાન વિભાગ દ્વારા 4 ઓગસ્ટે પણ દક્ષિણ ગુજરાતમાં સુરત, નવસારી, વલસાડ, તાપી, દમણ અને નગર-હવેલીમાં ઓરેન્જ એલર્ટ સાથે ભારે વરસાદની આગાહી કરવામાં આવી છે. તો બનાસકાંઠા, સાબરકાંઠા, અરવલ્લી, દાહોદ, મહીસાગર, નર્મદા, ભરૂચ અને ડાંગમાં પણ વરસાદની આગાહી કરવામાં આવી છે. 5 ઓગસ્ટના રોજ પણ સુરત, નવસારી, વલસાડ, ડાંગ, તાપી અને નગર-હવેલીમાં ભારે વરસાદની આગાહી કરવામાં આવી છે.

અમદાવાદમાં આજે ગાજવીજ સાથે ભારે વરસાદની આગાહી છે, તો સૌરાષ્ટ્રમાં ભાવનગરમાં આજે (3 ઓગસ્ટ) ઓરેન્જ એલર્ટ આપવામાં આવ્યું છે, જ્યારે સૌરાષ્ટ્રના બીજા જિલ્લાઓ માટે આજે વરસાદને લઇને યલો એલર્ટ જાહેર કરાયું છે. 4 ઓગસ્ટના સૌરાષ્ટ્રમાં અમરેલી, ભાવનગર અને ગીર સોમનાથમાં ભારે વરસાદની આગાહી છે.

આગામી 3 દિવસ દરિયાકાંઠાના જિલ્લાઓમાં માછીમારોને દરિયો ન ખેડવા સૂચના આપવામાં આવી છે. સમગ્ર રાજ્યમાં આગામી બે દિવસ ગાજવીજ સાથે વરસાદ પડશે. પવનની ઝડપ 45 કિમી પ્રતિ કલાક અને એનાથી વધુ રહશે. દક્ષિણ ગુજરાત અને દક્ષિણ પશ્ચિમ રાજસ્થાન પર વરસાદી સિસ્ટમ સક્રિય થઈ છે. હવામાન વિભાગના જણાવ્યા મુજબ, 1 જૂનથી અત્યારસુધીમાં ગુજરાતના ગ્રામ્યમાં 414 મિમી જેટલો વરસાદ વરસ્યો છે, જે સમાન્ય વરસાદ છે. જ્યારે સૌરાષ્ટ્રના ગ્રામ્ય 45 ટકા જેટલો વધુ વરસાદ વરસ્યો છે.