સમગ્ર વિશ્વમાં મંકીપોક્સ (Mpox)ના વધતા જતા કેસોની વચ્ચે કેન્દ્ર સરકારે પાકિસ્તાન અને બાંગ્લાદેશની સરહદો સાથે દેશનાં તમામ બંદરો, એરપોર્ટ પર એલર્ટ જાહેર કર્યું છે. કેન્દ્રીય સ્વાસ્થ્ય મંત્રાલયે અધિકારીઓને બહારથી આવતા પ્રવાસીઓમાં મંકીપોક્સનાં લક્ષણો અંગે સતર્ક રહેવા જણાવ્યું છે.

સત્તાવાર સૂત્રોએ જણાવ્યું હતું કે સ્વાસ્થ્ય મંત્રાલયે દિલ્હીની ત્રણ મોટી કેન્દ્રીય હોસ્પિટલો – રામ મનોહર લોહિયા, સફદરજંગ અને લેડી હાર્ડિંગમાં નોડલ કેન્દ્રો બનાવ્યાં છે. મંકીપોક્સના દર્દીઓની સારવાર અને સંભાળ માટે આ હોસ્પિટલોમાં આઇસોલેશન વોર્ડ બનાવવામાં આવ્યા છે.

કેન્દ્રએ તમામ રાજ્ય સરકારોને તેમનાં રાજ્યોની હોસ્પિટલોમાં મંકીપોક્સના દર્દીઓ માટે જરૂરી વ્યવસ્થા કરવા પણ સૂચના આપી છે. ભારતમાં હજુ સુધી મંકીપોક્સનો કોઈ કેસ નોંધાયો નથી. અધિકારીઓએ જણાવ્યું હતું કે અત્યારસુધીના મૂલ્યાંકન મુજબ, મોટે પાયે મંકીપોક્સ ફેલાવાનું જોખમ ઓછું છે.

બીજી તરફ પાડોશી દેશ પાકિસ્તાનમાં અત્યારસુધીમાં મંકીપોક્સના 4 કેસ નોંધાયા છે. સોમવારે (19 ઓગસ્ટ), પાકિસ્તાન અધિકૃત કાશ્મીર (PoK)માં એક શંકાસ્પદ કેસ નોંધાયો હતો. 47 વર્ષીય વ્યક્તિ તાજેતરમાં સાઉદી અરેબિયાથી પાકિસ્તાન પરત ફરી હતી.

તેમને ઈસ્લામાબાદની પાકિસ્તાન ઈન્સ્ટિટ્યૂટ ઓફ મેડિકલ સાયન્સ (PIMS)માં દાખલ કરવામાં આવ્યા છે. અગાઉ પાકિસ્તાનમાં મંકીપોક્સના ત્રણ કેસ નોંધાયા હતા. તમામ ખૈબર પખ્તુનખ્વા પ્રાંતના રહેવાસી હતા.

મંકીપોક્સ શીતળા જેવો વાઇરલ રોગ છે. સામાન્ય રીતે આ વાઇરસના ચેપની ઘણી આડઅસરો નથી, પરંતુ કેટલાક કિસ્સાઓમાં એ જીવલેણ બની શકે છે. આને કારણે, ફ્લૂ જેવાં લક્ષણો દેખાય છે અને શરીર પર પરૂ ભરેલા ઘા વિકસે છે. આ વાઇરસ ઓર્થોપોક્સ વાઇરસ જીનસ પરિવારનો સભ્ય છે, જે શીતળા માટે પણ જવાબદાર છે.

વર્લ્ડ હેલ્થ ઓર્ગેનાઇઝેશન (WHO)એ 14 ઓગસ્ટના રોજ મંકીપોક્સને વૈશ્વિક જાહેર આરોગ્ય કટોકટી જાહેર કરી હતી. બે વર્ષમાં આ બીજી વખત છે જ્યારે આ રોગને આરોગ્ય કટોકટી જાહેર કરવામાં આવી છે.

WHOના રિપોર્ટ અનુસાર, મંકીપોક્સની ઉત્પત્તિ આફ્રિકન દેશ કોંગોથી થઈ છે. આફ્રિકાના દસ દેશો એનાથી ગંભીર રીતે પ્રભાવિત છે. આ પછી એ ઝડપથી પાડોશી દેશોમાં ફેલાય છે અને એ વિશ્વના અન્ય દેશોમાં પણ ફેલાઈ શકે છે.

કોરોનાની જેમ એ હવાઈ મુસાફરી અને મુસાફરીનાં અન્ય માધ્યમો દ્વારા વિશ્વના વિવિધ ભાગોમાં ફેલાય છે. ડબ્લ્યુએચઓ પણ ચિંતિત છે, કારણ કે મંકીપોક્સના વિભિન્ન પ્રકોપમાં મૃત્યુદરમાં તફાવત છે. ઘણી વખત એ 10%થી વધુ થઈ ગયો છે.