ગુજરાત સરકાર દ્વારા સરકારી કર્મચારીઓ માટે હેલ્મેટ અને સીટ બેલ્ટનો ફરજિયાત અમલ કરવાનો આદેશ કરવામાં આવ્યો છે. જે અંતર્ગત ગઈકાલે વિવિધ સરકારી કચેરીઓ બહાર પોલીસ દ્વારા ચેકિંગ કરવામાં આવ્યું હતું. ત્યારે આજે સતત બીજા દિવસે શહેરની કોર્પોરેશન અને બહુમાળી સહિતની સરકારી કચેરીઓ બહાર પોલીસ દ્વારા સઘન ચેકિંગ કરવામાં આવ્યું હતું. આ દરમિયાન ખાસ હેલ્મેટનાં નિયમનો ભંગ કરવા બદલ અનેક સરકારી કર્મચારીઓ દંડાયા હતા.

પ્રાપ્ત વિગત મુજબ, શહેરની કોર્પોરેશન અને બહુમાળી કચેરી તેમજ કલેકટર ઓફિસ સહિતના સ્થળે સવારથી ટ્રાફિક પોલીસ અને ટ્રાફિક બ્રિગેડની ટીમો તેમજ RTO દ્વારા ચેકિંગ હાથ ધરવામાં આવ્યું હતું. જેમાં હેલ્મેટ પહેર્યા વિના જ આવેલા અનેક સરકારી કર્મચારીઓને સ્થળ પર રૂ. 500 દંડ ફટકારવામાં આવ્યો હતો. પોલીસની આ કામગીરી દરમિયાન કેટલાક કર્મચારીઓ પોતાના વાહન બહાર જ પાર્ક કરવા લાગ્યા હતા. જ્યારે દરરોજની જેમ કચેરીમાં પ્રવેશ કરનારાઓએ દંડ ભરવો પડતાં કચવાટ જોવા મળ્યો હતો.

રાજકોટ મનપા કચેરી ખાતે હેલ્મેટને લઈને ચાલી રહેલા ચેકિંગ દરમિયાન વોર્ડ નંબર 12 ના ભાજપના કોર્પોરેટર મગન સોરઠિયા પણ ટુ- વ્હીલરમાં હેલ્મેટ વિના આવતા પોલીસે તેમને અટકાવ્યા હતા. જ્યાં આ નગરસેવકે દંડ ભર્યા વિના મિટિંગમાં જવાનો આગ્રહ રાખ્યો હતો અને બાઇકની ચાવી પોલીસને આપી જવાનો પ્રયાસ કર્યો હતો. જોકે, પોલીસ કર્મચારી આ માટે સહમત નહીં થતા હવે બધા પાસેથી દંડ લેજો તેમ કહીને પોતે પણ દંડ ભર્યો હતો. આમ સામાન્ય આનાકાની બાદ બીજેપી કોર્પોરેટરે પણ દંડ ભર્યો હતો.

મનપા કચેરી ખાતે તૈનાત આરટીઓ ઇન્સપેક્ટર એચ. એ. પટેલે જણાવ્યું હતું કે, ગુજરાત સરકારનાં સામાન્ય વહીવટ વિભાગ દ્વારા જાહેરનામું બહાર પાડવામાં આવ્યું છે. જે અંતર્ગત કોઈપણ સરકારી કચેરીઓમાં ફરજ બજાવતા અને દ્વિચક્રી વાહનોનો ઉપયોગ કરતા કર્મચારીઓ માટે હેલ્મેટ ફરજિયાત કરવામાં આવ્યું છે. જેને લઈને આજે સતત બીજા દિવસે વિવિધ સરકારી કચેરીઓ બહાર પોલીસ અને આરટીઓની જુદી-જુદી ટીમો દ્વારા ચેકિંગ હાથ ધરવામાં આવ્યું છે અને હેલ્મેટ પહેર્યા વિના આવનારા તમામ કર્મચારીઓ પાસેથી દંડ વસુલ કરવામાં આવી રહ્યો છે.