નવા વર્ષની શરૂઆત સાથે જ કેન્દ્ર સરકારે હાઈવે અને એક્સપ્રેસ વે પર સાઈન બોર્ડ માટે નવી ગાઈડલાઈન જાહેર કરી છે. આ ગાઈડલાઈન 24 જાન્યુઆરીથી અમલમાં આવશે, તેનો ઉદ્દેશ્ય માર્ગ વપરાશકર્તાઓને સ્પષ્ટ, પ્રમાણિત અને સમયસર માહિતી પ્રદાન કરવાનો છે. આ ફેરફારો દ્વારા વધી રહેલા અકસ્માતો ઘટાડવા અને ટ્રાફિકને વધુ વ્યવસ્થિત બનાવવાના પ્રયાસો કરવામાં આવી રહ્યા છે.

નવી વ્યવસ્થા હેઠળ રમ્બલ સ્ટ્રિપ્સ જેવા સંભવિત ખતરનાક સ્થળો પહેલાં સાઈન બોર્ડ મૂકવામાં આવશે, જેથી ડ્રાઈવરોને પોતાની સ્પીડ કંટ્રોલ કરવાનો સમય મળી શકે. સ્પીડ લિમીટની જાણકારી દર પાંચ કિલોમીટરના અંતર પર સાઈન બોર્ડ દ્વારા આપવામાં આવશે. આ બોર્ડને એવી રીતે જ ડિઝાઈન કરવામાં આવ્યા છે જેથી ડ્રાઈવરો તેને સરળતાથી વાંચી અને સમજી શકે.

માર્ગ પરિવહન મંત્રાલયે સાઈન બોર્ડ પર વપરાતા અક્ષરો અને સંખ્યાઓના કદ અને રંગને પ્રમાણિત કર્યા છે. આ પગલાથી સાઈન બોર્ડની એકરૂપતા વધશે અને તેમને સમજવામાં સરળ રહેશે. તેમજ એક જ બોર્ડ પર જુદા જુદા વાહનોની સ્પીડ લિમિટ સ્પષ્ટ રીતે દર્શાવવાની વ્યવસ્થા કરવામાં આવી છે.

અકસ્માતો અને ટ્રાફિક જામ ઘટાડવા દર પાંચ કિલોમીટરે ‘નો પાર્કિંગ’ બોર્ડ લગાવવામાં આવશે. આ ઉપરાંત રાહદારીઓની સુરક્ષાને પ્રાથમિકતા આપતા ક્રોસિંગ અંગે આગોતરી માહિતી આપવાની વ્યવસ્થા કરવામાં આવી છે.