ઉત્તરાયણ નજીક આવતાં જ પતંગરસિયાઓને એક જ ચિંતા હોય છે કે પવનની ગતિ કેવી રહેશે? આ ઉત્તરાયણ પર હવે પતંગરસિયાઓ માટે માવઠું પણ ચિંતા વધારે એવી સ્થિતિ છે. હવામાન નિષ્ણાત અંબાલાલ પટેલે 12થી 18 જાન્યુઆરી દરમિયાન રાજ્યના કેટલાક વિસ્તારોમાં માવઠું થવાની આગાહી કરી છે. જો ઉત્તરાયણ સમયે જ માવઠું થાય તો પતંગરસિયાઓની મોજ પર પાણી ફરી વળી શકે છે. માવઠાની આગાહી સાથે સાથે રાજ્યમાં કડકડતી ઠંડીની પણ આગાહી કરવામાં આવી છે.

હવામાન નિષ્ણાત પરેશ ગોસ્વામીની આગાહી મુજબ, જાન્યુઆરી મહિનાના ફક્ત ચાર જ દિવસ ઠંડીમાંથી રાહત મળશે. ત્યાર બાદ 5 જાન્યુઆરી 2025થી અતિશય ઠંડીનો એક રાઉન્ડ શરૂ થવાની શક્યતા છે, જે 15 જાન્યુઆરી સુધી એટલે કે લગભગ 11થી 12 દિવસ સુધી ચાલુ રહેશે, જેમાં કેટલાક જિલ્લાઓમાં લાંબા ગાળા સુધી કોલ્ડવેવની પણ સંભાવના છે. આ ઉપરાંત એક જાન્યુઆરીથી છ જાન્યુઆરી સુધી ઉત્તર ગુજરાત, પૂર્વ ગુજરાત અને મધ્ય ગુજરાતના ભાગોમાં ઝાકળની પણ સંભાવના છે, જેથી ખેડૂતો માટે આ એક ચિંતાજનક બાબત થઈ શકે છે, કારણ કે જો ઝાકળવર્ષા વધુ માત્રામાં થાય તો શિયાળુ પાક જેવા કે ઘઉં, જીરુંને નુકસાન પહોંચી શકે છે. એમાં પણ જો ખેડૂતો દ્વારા પાકને પિયત કરવામાં આવ્યું હોય અને ઝાકળવર્ષા થાય તો ઊભો પાક નમી જતો હોય છે અને ભારે નુકસાન વેઠવું પડી શકે છે, તેથી એકથી છ જાન્યુઆરી દરમિયાન આગાહી કરવામાં આવી છે, જેથી ખેડૂતો સાવચેત રહી શકે છે, પરંતુ વધુ માત્રામાં આ ઝાકળવર્ષા રહેશે નહીં, ફક્ત કેટલાક ભાગોમાં છૂટાછવાયા વિસ્તારોમાં ઝાકળ પડી શકે છે.

તેમણે વધુમાં જણાવ્યું હતું કે આગામી પાંચ જાન્યુઆરી 2025થી ઠંડીના રાઉન્ડની શરૂઆત થશે, જેમાં પવનની ગતિ 15થી 20 કિલોમીટર પ્રતિ કલાકની રહી શકે છે. હાલમાં ગુજરાત પર ઉત્તર-પૂર્વ દિશા તરફથી આવતા પવનોની ગતિ 7થી 12 કિલોમીટર પ્રતિ કલાકની છે તથા પવનની દિશા પણ પૂર્વ તરફથી હોવાથી 4 જાન્યુઆરી 2025 સુધી મહત્તમ તાપમાનમાં બેથી ત્રણ ડિગ્રી સેલ્સિયસનો વધારો નોંધાઈ શકે છે, પરંતુ મોટા ભાગના જિલ્લાઓનું લઘુતમ તાપમાન યથાવત્ રહેવાની શક્યતા છે. ઉલ્લેખનીય છે કે મજબૂત વેસ્ટર્ન ડિસ્ટર્બન્સ લીધે ઉત્તર ભારતના ભાગોમાં આવતીકાલથી હિમવર્ષા થવાની પૂરેપૂરી શક્યતા દર્શાવે છે તથા જ્યારે પણ ઉત્તર ભારતમાં હિમવર્ષા થાય એના 48થી 72 કલાકમાં ગુજરાત પર ઠંડીનું પ્રમાણ વધતું હોય છે, એથી આગામી 5 જાન્યુઆરીથી ભયંકર ઠંડીની શરૂઆત થશે, જે સતત 10થી 11 દિવસ સુધી ચાલી શકે છે, એટલે કે ઉત્તરાયણ સુધી ઠંડીનું જોર વધવાની સંભાવના છે.

બીજી તરફ, હવામાન નિષ્ણાત અંબાલાલ પટેલે જાન્યુઆરી મહિનામાં માવઠાની આગાહી વ્યક્ત કરી છે. મહત્ત્વનું છે કે ડિસેમ્બર માસના છેલ્લા સપ્તાહમાં રાજ્યના કેટલાક ભાગોમાં માવઠું થયું હતું ત્યારે જાન્યુઆરી માસમાં પણ માવઠાની આગાહીથી ખેડૂતોમાં ચિંતા વ્યાપી શકે છે. હવામાન નિષ્ણાત અંબાલાલ પટેલે જણાવ્યું હતું કે જાન્યુઆરી માસમાં ગુજરાતના વાતાવરણમાં ભારે પલટો આવી શકે છે. આ ઉપરાંત ભારે પવન, કરા અને માવઠાની પણ શક્યતા છે. ખાસ કરીને ઉત્તર ભારતમાં હિમવર્ષાને કારણે ગુજરાતમાં ઠંડીનું પ્રમાણ વધી શકે છે. આગામી 4થી 8 જાન્યુઆરી દરમિયાન ઉત્તર ગુજરાત તથા મધ્ય ગુજરાતના જિલ્લાઓમાં ઠંડીનું મોજું ફરી વળશે, જેમાં મુખ્યત્વે પંચમહાલ સાબરકાંઠા સહિત ઉત્તર ગુજરાતના વિવિધ જિલ્લાઓનું લઘુતમ તાપમાન 8 ડિગ્રી સેલ્સિયસ સુધી પહોંચી શકે છે. આ ઉપરાંત કચ્છમાં પણ ઠંડીનું પ્રમાણ વધુ રહેશે અને નલિયામાં અત્યારસુધીમાં નોંધાયેલા લઘુતમ તાપમાન કરતાં પણ ઓછું તાપમાન જઈ શકે છે. દરિયાકાંઠાના વિસ્તારો, જેવા કે જામનગર અને વલસાડમાં પણ ઠંડીનું જોર યથાવત્ રહેવાની શક્યતા છે. આ ઉપરાંત રાજકોટ અને જૂનાગઢમાં પણ જાન્યુઆરી માસમાં લઘુતમ તાપમાન 12 ડિગ્રી કરતાં પણ નીચું જઈ શકે છે.

વર્ષ 2025ના જાન્યુઆરી માસમાં માવઠાની આગાહી કરતા હવામાન નિષ્ણાત અંબાલાલ પટેલે જણાવ્યું હતું કે મકરસંક્રાંતિના દિવસોમાં રાજ્યના કેટલાક ભાગોમાં કમોસમી વરસાદ વરસી શકે છે. આગામી 12થી 18 જાન્યુઆરી દરમિયાન માવઠાની શક્યતા છે, જેમાં ઉત્તર ગુજરાત, પૂર્વ ગુજરાત અને મધ્ય ગુજરાતમાં કમોસમી વરસાદ વરસી શકે છે. આ ઉપરાંત એ દિવસો દરમિયાન અમદાવાદ અને ગાંધીનગરના ભાગોના હવામાનમાં પણ પલટો આવશે. દક્ષિણ ગુજરાતમાં પણ વાદળછાયું વાતાવરણ રહેવાની શક્યતા છે. આ ઉપરાંત દક્ષિણ સૌરાષ્ટ્રમાં પણ વાદળિયું વાતાવરણ રહેશે અને છૂટાછવાયા હળવાં છાંટાં પડી શકે છે. આ ઉપરાંત પશ્ચિમ સૌરાષ્ટ્ર એટલે કે જામનગર સહિત સૌરાષ્ટ્રમાં વાદળછાયું વાતાવરણ થવાની શક્યતા છે.

ડિસેમ્બર 2024માં ગુજરાત રાજ્યમાં શિયાળો બરાબર જામ્યો હતો, પરંતુ જાન્યુઆરી 2025ની શરૂઆતના દિવસોમાં જ ઠંડીએ વિરામ લીધો છે. આ ઉપરાંત હજુ પણ આગામી પાંચ દિવસ ગુજરાત રાજ્યમાં શુષ્ક વાતાવરણ રહેવાની શક્યતાઓ છે. આ સાથે જ આગામી ત્રણ દિવસ લઘુત્તમ અને મહત્તમ તાપમાન યથાવત રહેવાની સંભાવના હવામાન વિભાગ દ્વારા વ્યક્ત કરવામાં આવી છે. તથા જાન્યુઆરી માસમાં પણ સામાન્ય કે સામાન્ય કરતાં વધુ લઘુત્તમ તાપમાન રહેવાની સંભાવના છે. બીજી તરફ જાન્યુઆરી માસમાં કોલ્ડવેવના દિવસો પણ વધુ રહેશે. ખાસ કરીને સૌરાષ્ટ્ર કચ્છમાં હાડ થીજવતી ઠંડી વરતાઈ શકે છે.

હવામાન વિભાગ ના ડાયરેક્ટર એ.કે.દાસના જણાવ્યા અનુસાર, આગામી પાંચ દિવસ ગુજરાત રાજ્યમાં શુષ્ક વાતાવરણ રહેશે તથા પવનની દિશા પણ ઉત્તર પૂર્વ અને પૂર્વ તરફથી રહેતા આગામી ત્રણ દિવસ તાપમાનમાં મોટા ફેરફારની શક્યતાઓ નહિવત છે તથા લઘુત્તમ અને મહત્તમ તાપમાન યથાવત રહેશે. ત્યારબાદ સૌરાષ્ટ્ર કચ્છના ભાગોમાં ઠંડીનું પ્રમાણ વધુ રહેશે તથા ઉત્તર ગુજરાતમાં અને મધ્યપ્રદેશને નજીક આવેલા પૂર્વ ગુજરાતના જિલ્લાઓમાં પણ ઠંડીનું પ્રમાણ વધુ રહેશે. મધ્ય ગુજરાત અને સૌરાષ્ટ્રના ભાગોમાં પણ જાન્યુઆરી માસમાં ઠંડીનું પ્રમાણ વધુ રહેશે તથા ડિસેમ્બર મહિનામાં કોલ્ડવેવના જેટલા દિવસો નોંધાયા હતા તેના કરતાં પણ વધુ એટલે કે સામાન્ય કે સામાન્યથી વધુ દિવસો સુધી રાજ્યના વિવિધ ભાગોમાં કોલ્ડ વેવની શક્યતાઓ છે. રાત્રિ દરમિયાન લઘુત્તમ તાપમાન સામાન્ય કે સામાન્યથી વધુ રહેવાની શક્યતાઓ છે.

છેલ્લા 24 કલાક દરમિયાન રાજ્યભરના વિવિધ જિલ્લાઓનું લઘુત્તમ તાપમાન અડધાથી બે ડિગ્રી સેલ્સિયસ સુધી વધ્યું છે. જેમાં છેલ્લા 24 કલાક દરમિયાન રાજ્યમાં સૌથી ઓછું 9 ડિગ્રી સેલ્સિયસ લઘુત્તમ તાપમાન નલિયામાં નોંધાયું હતું. આ ઉપરાંત અન્ય ચાર મહાનગરોમાં પણ ઠંડીનું પ્રમાણ ઓછું રહ્યું હતું. અમદાવાદમાં ગતરાત્રિ દરમિયાન 15 ડિગ્રી સેલ્સિયસ, વડોદરામાં 15.8 ડીગ્રી સેલ્સિયસ, રાજકોટમાં 12.4 ડિગ્રી સેલ્સિયસ અને સુરતમાં 18.4 ડિગ્રી સેલ્સિયસ લઘુત્તમ તાપમાન નોંધાયું હતું. આજે પણ અમદાવાદ શહેરમાં 15 ડિગ્રી સેલ્સિયસ જ્યારે ગાંધીનગરમાં 14 ડિગ્રી સેલ્સિયસની આસપાસ લઘુત્તમ તાપમાન રહેવાની શક્યતાઓ છે.