રાજ્યમાં ચાલતી હજારો પ્રી-સ્કૂલ માટે સરકારે કડક નિયમોની અમલવારી કરતાં જ પ્રી-સ્કૂલ સંચાલકોમાં રોષ ફાટી નીકળ્યો હતો અને રાજ્યવ્યાપી આંદોલન છેડાયું હતું. પ્રી-સ્કૂલ સંચાલકોની અનેક રજૂઆતો બાદ પણ સરકાર દ્વારા કોઈ ફેરફાર ન કરાતાં સંચાલકોએ ફરીવાર ગાંધીનગરમાં સચિવાલય પહોંચી રજૂઆત કરવાની ચીમકી ઉચ્ચારી હતી, જોકે ગઈકાલે (1 જાન્યુઆરી) પ્રી-સ્કૂલ સંચાલકો અને શિક્ષણ વિભાગના અધિકારીઓ વચ્ચે મળેલી બેઠકમાં મહત્ત્વની ત્રણ માગણીનો મૌખિક સ્વીકાર કરવામાં આવ્યો છે. ફેરફાર કરાયેલા નિયમોની ટૂંક સમયમાં જ સત્તાવાર જાહેરાત કરાશે.

પ્રી-પ્રાઇમરી શાળાના સંચાલકો પાછલા કેટલાક સમયથી રાજ્યભરમાં વિરોધ નોંધાવી આંદોલન કરી રહ્યા હતા. રાજ્ય સરકારના શિક્ષણ વિભાગે પ્રી-પ્રાઇમરી શાળા ચલાવતા સંચાલકો માટે કેટલાક નવા નીતિ-નિયમો જાહેર કર્યા હતા, જેમાં ફરજિયાત 15 વર્ષનો રજિસ્ટર્ડ ભાડાકરાર, એજ્યુકેશન બીયુ પરમિશન, દર વર્ષે વર્ગદીઠ 5 હજાર રજિસ્ટ્રેશન ફી, ટ્રસ્ટ કે સંસ્થાનું રજિસ્ટેશન કરાવવું સહિતના નિયમો લાવવામાં આવ્યા હતા.

આ નિયમો સામે શાળાના સંચાલકોમાં નારાજગી હતી અને વિરોધ નોંધાવી રહ્યા હતા, જોકે હવે શિક્ષણમંત્રી અને શિક્ષણ વિભાગના અધિકારીઓ સાથેની ગઈકાલની બેઠકમાં મહત્ત્વની ત્રણ માગણીનો મૌખિક સ્વીકાર કરવામાં આવ્યો છે, જેની સત્તાવાર જાહેરાત ટૂંક સમયમાં જ કરાશે.

15 વર્ષના રજિસ્ટર્ડ ભાડાકરારને બદલે 5 વર્ષનો નોટરાઇઝડ ભાડાકરારની માગ સ્વીકારી છે.

જૂના ઠરાવમાં વર્ગદીઠ 5 હજાર ભરવાની જોગવાઈ કરવામાં આવી હતી, જેમાં બદલાવ કરીને વર્ગદીઠ નહીં, પરંતુ આખી શાળા માટે રૂપિયા 10,000ની ફી રજિસ્ટ્રેશન ફી પેટે નક્કી કરવામાં આવી છે.

પ્રી-પ્રાઇમરી સ્કૂલના રજિસ્ટ્રેશન માટે ફેબ્રુઆરી મહિનામાં મુદત પૂરી થતી હતી, જેના સ્થાને 6 મહિના સુધી રજિસ્ટ્રેશન માટે સમયમર્યાદા વધારવામાં આવી છે.

આ ત્રણ માગનો શિક્ષણ વિભાગે મૌખિક રીતે સ્વીકાર કર્યો છે, જેથી પાછલા લાંબા સમયથી અલગ અલગ રીતે વિરોધમાં આવી રહેલા પ્રી-પ્રાઇમરી સ્કૂલના સંચાલકોના પ્રશ્નોનું નિરાકરણ આવ્યું છે.

આ અંગે શાળા સંચાલક મંડળના પ્રમુખ જણાવ્યું હતું કે નવા નિયમો સાથે રજિસ્ટ્રેશન કરાવવું અઘરું હતું, જેથી અનેક સ્કૂલોએ હજુ રજિસ્ટ્રેશનની પ્રક્રિયા કરી ન હતી, પરંતુ ગઈકાલે બેઠક થઈ એમાં કેટલાક નિયમો હળવા કરવાની ચર્ચા કરવામાં આવી હતી, જેથી આગામી સમયમાં તમામ સ્કૂલો રજિસ્ટ્રેશન કરાવશે. આ નિર્ણયથી સંચાલકોમાં પણ સંતોષ છે. સરકાર દ્વારા ટૂંક સમયમાં નવા નિયમો અને મુદતમાં વધારો જાહેર કરવામાં આવશે.