નર્મદા જિલ્લા સહિત સમગ્ર ગુજરાતમાં માધ્યમિક અને ઉચ્ચતર માધ્યમિક શિક્ષણ બોર્ડની પરીક્ષાઓ ચાલી રહી છે. આ વર્ષે એક નોંધપાત્ર બદલાવ જોવા મળ્યો છે. વિદ્યાર્થીઓમાં આવેલી જાગૃતિને કારણે પરીક્ષા કેન્દ્રો પર મૂકવામાં આવેલી પ્રાયશ્ચિત પેટી સંપૂર્ણપણે ખાલી જોવા મળી રહી છે.

અંબુભાઈ પુરાણી સ્કૂલના આચાર્ય અને પરીક્ષા કેન્દ્રના અધ્યક્ષ જીગેશ પટેલના જણાવ્યા મુજબ, પરીક્ષા શરૂ થઈ ત્યારથી અત્યાર સુધી પ્રાયશ્ચિત પેટીમાં એક પણ કાપલી મળી નથી. વિદ્યાર્થીઓનું નિયમિત ચેકિંગ કરવામાં આવે છે, પરંતુ કોઈ પાસેથી ગેરરીતિનો સામાન મળ્યો નથી.

જિલ્લા શિક્ષણાધિકારી ડૉ. કિરણ પટેલે આ સકારાત્મક બદલાવ માટેના કારણો જણાવ્યા. તેમના મતે, પરીક્ષા પહેલા શાળાઓમાં અને વાલી મીટિંગોમાં જાગૃતિ અભિયાન ચલાવવામાં આવ્યું. વિદ્યાર્થીઓ સાથે ઓનલાઈન મીટિંગ કરી કાપલી કે મોબાઈલ લાવવા સામે કડક કાર્યવાહીની ચેતવણી આપવામાં આવી.

શિક્ષકોએ વિદ્યાર્થીઓને ઊંચા માર્ક્સ મેળવવા માટે યોગ્ય માર્ગદર્શન આપ્યું છે. નિયમિત ટેસ્ટ લેવાથી વિદ્યાર્થીઓમાં આત્મવિશ્વાસ વધ્યો છે. વાલીઓ અને વિદ્યાર્થીઓ બંનેમાં આવેલી જાગૃતિને કારણે હવે વિદ્યાર્થીઓ પોતાની મહેનતથી સારા પરિણામ મેળવવા પ્રયત્નશીલ બન્યા છે.