ઉત્તર પ્રદેશની એન્ટી ટેરરિસ્ટ સ્ક્વોડ (ATS) અને કાટઘર પોલીસની સંયુક્ત ટીમે હિઝબુલ મુજાહિદ્દીનના ફરાર આતંકી ઉલ્ફત હુસૈનની ધરપકડ કરી છે. ૧૮ વર્ષથી ફરાર આતંકી પર 25, 000 રૂપિયાનું ઈનામ જાહેર કરવામાં આવ્યું હતું. ઉલ્ફત હુસૈન ઉર્ફે મોહમ્મદ સૈફુલ્લાહ ઇસ્લામ ઉર્ફે અફઝલ ઉર્ફે પરવેઝ ઉર્ફે હુસૈન મલિક, જે ફઝલાબાદ, સુરનકોટ, પૂંછ (જમ્મુ અને કાશ્મીર)નો રહેવાસી છે, તેની વર્ષ 2001માં મુરાદાબાદના કટઘર પોલીસ સ્ટેશન વિસ્તારમાંથી ધરપકડ કરવામાં આવી હતી.

આતંકી ઉલ્ફત હુસૈનના કબજામાંથી મોટી માત્રામાં હથિયારો અને વિસ્ફોટકો મળી આવ્યા હતા. આ કેસમાં ઉલ્ફત હુસૈન વિરુદ્ધ 307 આઈપીસી, આર્મ્સ એક્ટ, પોટા અને ક્રિમિનલ લો એક્ટ હેઠળ કેસ નોંધવામાં આવ્યા હતા. વર્ષ 2015માં તેની સામે કાયમી ધરપકડ વોરંટ જારી કરવામાં આવ્યું હતું. આ પછી તે ફરાર થઈ ગયો. બીજી માર્ચે વરિષ્ઠ પોલીસ અધિક્ષકે તેના પર 25,000 રૂપિયાનું ઇનામ જાહેર કર્યું હતું.

ATS તપાસમાં સામે આવ્યું હતું કે, ઉલ્ફત હુસૈને 1999-2000માં આતંકી તાલીમ લીધી હતી. આ પછી તે મુરાદાબાદ આવ્યો અને એક મોટી આતંકી ઘટનાને અંજામ આપવાની યોજના બનાવી રહ્યો હતો. તેની પાસેથી મળેલા હથિયારો અને વિસ્ફોટકો પાકિસ્તાનથી લાવવામાં આવ્યા હતા. ટેકનિકલ અને ગુપ્ત માહિતીના આધારે, ATS સહારનપુર અને મુરાદાબાદ પોલીસની ટીમે તેને જમ્મુ અને કાશ્મીરના પૂંછ જિલ્લામાંથી ધરપકડ કરી.

ઉલ્ફત હુસૈન સામે મુરાદાબાદ અને જમ્મુ-કાશ્મીરમાં અનેક કેસ નોંધાયેલા છે, જેમાં આર્મ્સ એક્ટ, એક્સપ્લોઝિવ એક્ટ અને આતંકવાદ નિવારણ અધિનિયમનો સમાવેશ થાય છે. આ કામગીરીને સફળ બનાવવામાં એટીએસ ઈન્સ્પેક્ટર ઇનચાર્જ સુધીર કુમાર ઉજ્જવલ, કાટઘર પોલીસ સ્ટેશનના સબ-ઇન્સ્પેક્ટર વિમલ કિશોર, વિપિન કુમાર અને એટીએસ સહારનપુર ફિલ્ડ યુનિટની ટીમ સામેલ હતી.