આજે એટલે કે 21 એપ્રિલના રોજ સોનાના ભાવે નવી ઓલ ટાઈમ હાઈ બની છે. ઈન્ડિયા બુલિયન એન્ડ જ્વેલર્સ એસોસિએશન (IBJA) અનુસાર 24 કેરેટ સોનાના 10 ગ્રામનો ભાવ ₹1,677 વધીને ₹96,587 પર બંધ થયો. અગાઉ 10 ગ્રામ સોનાનો ભાવ ₹94,910 હતો.

તે જ સમયે આજે એક કિલો ચાંદીનો ભાવ ₹1,049 વધીને ₹96,200 પ્રતિ કિલો થયો છે. અગાઉ ચાંદીનો ભાવ ₹95,151 પ્રતિ કિલો હતો. 28 માર્ચે ચાંદીએ 1,00,934 રૂપિયાની ઓલ ટાઈમ હાઈ બનાવી હતી.

• અમેરિકાની ટેરિફ નીતિને કારણે ટ્રેડવોરનો ભય વધી ગયો છે. આનાથી અર્થતંત્રનો વિકાસદર ધીમો પડી શકે છે. વૈશ્વિક મંદીની આશંકા પણ વધી ગઈ છે. આવી સ્થિતિમાં લોકો સોનામાં રોકાણ વધારી રહ્યા છે. મંદીના સમયમાં સોનાને સલામત રોકાણ માનવામાં આવે છે.
• ડોલર સામે રૂપિયાના નબળા પડવાના કારણે સોનાના ભાવમાં વધારો થયો છે. આનું કારણ એ છે કે જ્યારે રૂપિયો નબળો પડે છે ત્યારે એને આયાત કરવા માટે વધુ પૈસા ખર્ચ થાય છે. આ વર્ષે રૂપિયાનું મૂલ્ય લગભગ 4% ઘટ્યું છે, જેના કારણે સોનાના ભાવ પર દબાણ આવ્યું છે.
• લગ્નની મોસમ નજીક આવી રહી છે, તેથી સોનાના દાગીનાની માગ વધી રહી છે. મુંબઈ, દિલ્હી અને ચેન્નઈ જેવાં શહેરોના ઝવેરીઓએ જણાવ્યું હતું કે ઊંચા ભાવ હોવા છતાં વેચાણ તેજીથી થયું હતું, કારણ કે લોકો સોનાને રોકાણ અને સમૃદ્ધિનું પ્રતીક માને છે.

આ વર્ષે, 1 જાન્યુઆરીથી અત્યાર સુધીમાં, 24 કેરેટ સોનાના 10 ગ્રામનો ભાવ 76,162 રૂપિયાથી 19,045 રૂપિયા વધીને 95,207 રૂપિયા થયો છે. તેમજ, ચાંદીનો ભાવ પણ86,017 રૂપિયા પ્રતિ કિલોથી 9,622 રૂપિયા વધીને 95,639 રૂપિયા થયો છે. તેમજ, ગયા વર્ષે એટલે કે 2024માં, સોનું 12,810 રૂપિયા મોંઘુ થયું હતું.

અમેરિકા અને ચીન વચ્ચે વધતા ટ્રેડવોર અને મંદીના ભયને કારણે આ વર્ષે સોનું 3,700 ડોલર પ્રતિ ઔંસ સુધી પહોંચી શકે છે. ઈન્ટરનેશનલ રેટ મુજબ ગણતરી કરીએ તો ભારતમાં 10 ગ્રામ સોનાની કિંમત 1.10 લાખ રૂપિયા સુધી જઈ શકે છે. વિદેશી ઈન્વેસ્ટમેન્ટ બેંક ગોલ્ડમેને આ અંદાજ જાહેર કર્યો છે.