ભારત-ઈંગ્લેન્ડ વચ્ચેની પાંચ ટેસ્ટ મેચોની સિરીઝની બીજી ટેસ્ટ મેચમાં ભારતીય સુકાની શુભમન ગીલે ઈતિહાસ રચ્યો છે. તેણે મેચના બીજા દિવસે 200 રન નોંધાવ્યા છે. તેણે 21 ફોર અને બે સિક્સની મદદથી 311 બોલમાં 200 રન નોંધાવ્યા છે. ગિલે મેચના પ્રથમ દિવસે જ સદી ફટકારી હતી, ત્યારે હવે તેણે બેવડી સદી ફટકારી ઈતિહાસ રચી દીધો છે. જ્યારે શુભમન ગીલે 200 રન નોંધાવ્યા ત્યારે ભારતનો સ્કરો છ વિકેટે 472 રન હતો. આ પહેલા ઓપનિંગમાં આવેલા યશસ્વી જયસ્વાલે 87 રન, કે.એલ.રાહુલે બે રન, કરુણ નાયરે 31 રન, રિષભ પંતે 25 રન, નિતિશ કુમાર રેડ્ડીએ 1 રન, રવિન્દ્ર જાડેજાએ 89 રન નોંધાવ્યા હતા. આ સાથે ગિલે વિરાટ કોહલી, સુનિલ ગાવસ્કાર, મોહમ્મદ અઝરુદ્દીન અને રાહુલ દ્રવિડનો રેકોર્ડ પણ તોડ્યો છે.

શુભમન ગિલ ઈંગ્લેન્ડ વિરુદ્ધ બેવડી સદી ફટકાર પહેલો ભારતીય સુકાની બન્યો છે. આ પહેલા પ્રથમ ટેસ્ટમાં ભારતનો પાંચ વિકેટે પરાજય થયો હતો. પ્રથમ દિવસની રમતમાં ગિલે સદી ફટકારી હતી. તેણે 199 બોલમાં 11 ફોરની મદદથી સદી ફટકારી પોતાના ટેસ્ટ કેરિયરની સાતમી સદી ફટકારી હતી. તેણે સતત બીજી ટેસ્ટ મેચમાં સદી ફટકારી છે. પ્રથમ ટેસ્ટમાં પણ ગિલે 227 બોલમાં 19 ફોર અને એક સિક્સની મદદથી 147 રન નોંધાવ્યા હતા.

બીજા દિવસની રમતમાં ભારતીય ઓલરાઉન્ડ રવિન્દ્ર જાડેજા પણ છવાયો હતો. તેણે 137 બોલમાં 10 ફોર અને એક સિક્સ સાથે 89 રન નોંધાવ્યા હતા. શુભમન ગીલ અને જાડેજા વચ્ચે 203 રન ભાગીદારી નોંધાઈ હતી. 

એજબેસ્ટન ટેસ્ટમાં ભારતની પ્લેઈંગ-11માં યશસ્વી જયસ્વાલ, કેએલ રાહુલ, કરુણ નાયર, શુભમન ગિલ (કેપ્ટન), ઋષભ પંત (વાઈસ-કેપ્ટન/વિકેટકીપર), નીતિશ કુમાર રેડ્ડી, રવીન્દ્ર જાડેજા, વોશિંગ્ટન સુંદર, આકાશ દીપ, મોહમ્મદ સિરાજ, પ્રસીદ કૃષ્ણનો સમાવેશ કરાયો છે, જ્યારે ઈંગ્લેન્ડ તરફથી જેક ક્રોલી, બેન ડકેટ, ઓલી પોપ, જો રૂટ, હેરી બ્રુક, બેન સ્ટોક્સ (કેપ્ટન), જેમી સ્મિથ (વિકેટકીપર), ક્રિસ વોક્સ, બ્રાયડન કાર્સ, જોશ ટંગ, શોએબ બશીરનો સમાવેશ કરાયો છે.

ગિલે રાહુલ દ્રવિડનો રેકોર્ડ તોડ્યો

• ગિલ ઈંગ્લેન્ડમાં કોઈપણ ટેસ્ટ મેચમાં બેવડી સદી ફટકારના પ્રથમ ભારતીય સુકાની બન્યો છે. આ પહેલા કોઈપણ ભારતીય સુકાની આવુ કારનામુ કરી શક્યો નથી. આ પહેલા મોહમ્મદ અઝરુદ્દીને શ્રેષ્ઠ પ્રદર્શન કર્યું હતું. તેણે 1990-ઓગસ્ટમાં માન્ચેસ્ટરમાં રમાયેલી મેચમાં 179 રન નોંધાવ્યા હતા.
• ઈંગ્લેન્ડમાં ટેસ્ટ મેચમાં બેવડી સદી ફટકારનાર ગીલ ત્રીજો ભારતીય ખેલાડી બન્યો છે. ગિલ પહેલા સુનીલ ગાવસ્કાર અને રાહુલ દ્રવિડ બેવડી સદી ફટકારી ચુક્યા છે.
• ગિલે વિરાટ કોહલીનો રેકોર્ડ તોડ્યો છે. કોહલીએ 2016માં વેસ્ટઈન્ડિઝ વિરુદ્ધ નોર્થસાઉન્ટ ટેસ્ટમાં 200 રન કર્યા હતા.
• ગિલે 222 રન નોંધાવતાની સાથે જ ગાવસ્કરનો રેકોર્ડ તોડ્યો છે. ગાવસ્કરે 1979માં ઓવલ ટેસ્ટમાં 221 રન કર્યા હતા.

વિરાટ કોહલીએ તેની ટેસ્ટ કેરિયરમાં સુકાની તરીકે કુલ સાત બેવડી સદી ફટકારી છે. જ્યારે મંસૂર અલી ખાન પટોડી, સુનીલ ગાવસ્કાર, સચિન તેંડુલકર, એમ.એસ.ધોની, શુભમન ગિલે એક-એક બેવડી સદી ફટકારી ચુક્યા છે.