લૂઝ ફાસ્ટેગ રાખનાર યૂઝર્સને હવે બ્લેકલિસ્ટ કરવામાં આવશે. જાણીજોઈને ફાસ્ટેગને ગાડીની વિન્ડસ્ક્રીન પર ન લગાવનાર યૂઝર્સને લૂઝ ફાસ્ટેગ અથવા ટેગ-ઇન-હેન્ડ કહેવામાં આવે છે. નેશનલ હાઇવે ઓથોરિટી ઓફ ઇન્ડિયા(NHAI) પ્રમાણે, આનાથી ઈ-ટોલ કલેક્શન સિસ્ટમમં ગડબડી આવે છે અને બાકી યાત્રીઓને પરેશાની થાય છે.

નેશનલ હાઇવે ઓથોરિટી ઓફ ઇન્ડિયા (NHAI) એ ફાસ્ટેગનો દુરુપયોગ અટકાવવા માટે આ નિયમ લાગુ કર્યો છે. હવે જો કોઈ ડ્રાઇવર વાહનના વિન્ડશિલ્ડ પર ફાસ્ટેગ ચોંટાડતો નથી અને ટોલ પ્લાઝા પર તેના હાથમાં (જેને ‘લૂઝ ફાસ્ટેગ’ અથવા ‘ટેગ-ઇન-હેન્ડ’ કહેવાય છે) બતાવે છે, તો તેના ફાસ્ટેગને બ્લેકલિસ્ટ કરવામાં આવશે.

કેટલાક ડ્રાઇવરો જાણી જોઈને ફાસ્ટેગને વિન્ડસ્ક્રીન પર ચોંટાડતા નથી. તેઓ તેને હાથથી બતાવીને સ્કેન કરાવે છે. આમાં વધુ સમય લાગે છે અને ટોલ પ્લાઝા પર જામ થાય છે. આનાથી અન્ય મુસાફરોને પણ મુશ્કેલી પડે છે.

આ ઉપરાંત, કેટલાક વાહનચાલકો એક જ ફાસ્ટ ટેગનો ઉપયોગ અનેક વાહનો માટે કરવાનો પ્રયાસ કરે છે. જેના કારણે ટોલ પરથી પસાર થતા વાહનોના ડેટામાં મેળ ખાતો નથી. આ ગેરકાયદેસર છે.

NHAI એ 11 જુલાઈ 2025ના રોજ આ જાહેરાત કરી હતી. ટોલ કલેક્શન એજન્સીઓને તાત્કાલિક આવા ફાસ્ટેગની જાણ કરવા કહેવામાં આવ્યું છે, જેના આધારે NHAI ફાસ્ટેગને બ્લેકલિસ્ટ કરશે.

NHAI ટૂંક સમયમાં ‘વાર્ષિક પાસ સિસ્ટમ’ અને ‘મલ્ટી-લેન ફ્રી ફ્લો (MLFF)’ ટોલિંગ રજૂ કરવા જઈ રહ્યું છે. આ નવી સિસ્ટમોમાં, ફાસ્ટેગની સાચી સ્થિતિ ખૂબ જ મહત્વપૂર્ણ છે, જેથી ટોલ વસૂલાત અવિરત રહે અને સિસ્ટમની વિશ્વસનીયતા જળવાઈ રહે.

NHAI એ ટોલ કલેક્શન એજન્સીઓને એક ખાસ ઈમેલ આઈડી આપ્યો છે, જેના દ્વારા તેઓ આવા ફાસ્ટેગ વિશે તાત્કાલિક માહિતી આપી શકે છે. આ પછી, NHAI તે ફાસ્ટેગને બ્લેકલિસ્ટ અથવા હોટલિસ્ટ કરશે, જેના કારણે તે કામ કરવાનું બંધ કરી દેશે.

સરકારે જાહેરાત કરી છે કે હવે ફાસ્ટેગ માટે વાર્ષિક પાસનો વિકલ્પ હશે. તેની કિંમત 3,000 રૂપિયા હશે. આ પાસ 15 ઓગસ્ટથી ઉપલબ્ધ થશે. હાલમાં, જરૂરિયાત મુજબ ફક્ત માસિક પાસ અને રિચાર્જ સુવિધા ઉપલબ્ધ છે. આ પાસ કાર, જીપ, વાન જેવા ખાનગી વાહનો માટે છે. તે એક વર્ષ માટે અથવા 200 ટોલ પાર કરવા માટે માન્ય રહેશે. એટલે કે, એક ટોલ પાર કરવાનો ખર્ચ લગભગ 15 રૂપિયા હશે. સરકારનો દાવો છે કે આનાથી દેશભરના રાષ્ટ્રીય ધોરીમાર્ગોના ટોલ પ્લાઝા પર ભીડ ઓછી થશે.