ગુજરાતમાં શિયાળો જામી ચૂક્યો છે. છેલ્લા કેટલાક દિવસથી લઘુત્તમ તાપમાનમાં નોંધપાત્ર ઘટાડો જોવા મળતા હાલમાં હાડ થીજવતી ઠંડી પડી રહી છે. હવામાન વિભાગના તાજેતરના અહેવાલ મુજબ, કચ્છનું નલિયા 4.8 ડિગ્રી લઘુત્તમ તાપમાન સાથે સમગ્ર રાજ્યમાં સૌથી ઠંડુ શહેર નોંધાયું છે. નલિયામાં નોંધાયેલું તાપમાન ગુજરાતમાં આ સિઝનનું સૌથી નીચું તાપમાન છે. આ સિવાય સૌરાષ્ટ્રના પણ ઠંડી ભૂક્કા બોલાવી રહી છે. અમરેલી 8.6 ડિગ્રી લધુત્તમ તાપમાન સાથે બીજા નંબર પર રહ્યું છે. જ્યારે રાજકોટમાં પણ તાપમાનનો પારો ગગડીને 9.4 ડિગ્રીએ પહોંચી ગયો છે.

રાજ્યનાં તાપમાનમાં છેલ્લા 24 કલાકમાં 3થી 4 ડિગ્રીનો ઘટાડો નોંધાયો છે, જેના કારણે રાત્રિના અને સવારના સમયે હાડ થીજવતી ઠંડીનો અનુભવ થઈ રહ્યો છે. સિઝનમાં પહેલીવાર અમદાવાદમાં 11.7 ડિગ્રી તાપમાન નોંધાયું છે, જે સિઝનનું સૌથી નીચું છે. આ સાથે જ ઉત્તર ગુજરાતના ડીસામાં પણ 10.1 ડિગ્રી તાપમાન સાથે ઠંડીનું જોર યથાવત્ રહ્યું છે. જ્યારે ભુજ જેવા શહેરોમાં લઘુત્તમ તાપમાન 11 ડિગ્રીની આસપાસ નોંધાયું છે.

બીજી તરફ, રાજ્યના વિવિધ વિસ્તારોમાં મહત્તમ અને લઘુત્તમ તાપમાન વચ્ચે મોટો ફેરફાર જોવા મળી રહ્યો છે. દક્ષિણ ગુજરાતના ડાંગ અને સુરતમાં મહત્તમ તાપમાનનો પારો 30 ડિગ્રીને પાર પહોંચતા દિવસે સામાન્ય ગરમીનો અનુભવ થયો છે. જ્યાં ડાંગમાં સૌથી વધુ 30.9 ડિગ્રી મહત્તમ તાપમાન નોંધાયું છે. રાજ્યના મોટાભાગના શહેરોમાં મહત્તમ તાપમાન 24થી 29 ડિગ્રીની વચ્ચે રહેતા મિશ્ર ઋતુ જેવો માહોલ જોવા મળી રહ્યો છે. દરિયાકાંઠાના વિસ્તારો જેમ કે ઓખા અને દીવમાં લઘુત્તમ તાપમાન 15 ડિગ્રીથી ઉપર રહેતા ત્યાં ઠંડીની અસર પ્રમાણમાં ઓછી વર્તાઈ છે.

શિયાળુ હવામાનના કારણે અમદાવાદ એરપોર્ટ પર આજે વિસિબિલિટી ઓછી નોંધાઈ હતી, જેના કારણે ફ્લાઇટ સેવાઓ પર અસર પડી છે. છેલ્લા ઘણા દિવસોથી ઘણી ફ્લાઇટ ડીલે અને કેન્સલ થઈ રહી છે. ત્યારે આજે પણ રાત્રે 12 વાગ્યાથી બપોરે 12 વાગ્યા પહેલા અમદાવાદ એરપોર્ટ પરથી આવતી અને જતી કુલ 13 ફ્લાઇટ્સ ડીલે થઈ હતી.