સોનાની કિંમત આજે એટલે કે 21 જાન્યુઆરીએ 1.50 લાખ રૂપિયાને પાર કરી ગઈ છે. ઇન્ડિયા બુલિયન એન્ડ જ્વેલર્સ એસોસિયેશન (IBJA) અનુસાર, સોનું આજે 7,795 રૂપિયા વધીને 1,55,204 રૂપિયા પ્રતિ 10 ગ્રામ પર ખુલ્યું છે. ગઈકાલે તે 1,47,409 રૂપિયા પર હતું. સોનું આ વર્ષે અત્યાર સુધીમાં 21,744 રૂપિયા મોંઘું થઈ ચૂક્યું છે.

જ્યારે 1 કિલો ચાંદીની કિંમત આજે 10,730 રૂપિયા વધીને 3,20,075 રૂપિયા પર પહોંચી ગઈ છે. આ પહેલા ગઈકાલે તે 3,09,345 રૂપિયા પર હતી. ચાંદી આ વર્ષે માત્ર 21 દિવસમાં જ 90,825 રૂપિયા મોંઘી થઈ ચૂકી છે. સોના-ચાંદીના ભાવ સતત ત્રીજા દિવસે તેમની સર્વોચ્ચ સપાટી પર છે.

સોનામાં તેજીના 3 મોટા કારણો

• વૈશ્વિક તણાવ અને ‘ગ્રીનલેન્ડ‘ વિવાદ: અમેરિકી રાષ્ટ્રપતિ ડોનાલ્ડ ટ્રમ્પની ગ્રીનલેન્ડ પર કબજો કરવાની જીદ અને આ મુદ્દે યુરોપિયન દેશોને ટેરિફની ધમકીએ વૈશ્વિક બજારોમાં અસ્થિરતા વધારી દીધી છે. જ્યારે પણ દુનિયામાં ટ્રેડ વોરનો ખતરો વધે છે, રોકાણકારો શેરબજારમાંથી પૈસા કાઢીને સુરક્ષિત રોકાણ એટલે કે સોના તરફ ભાગે છે.
• રૂપિયાની રેકોર્ડ નબળાઈ : ભારતમાં સોનાની કિંમત ફક્ત વૈશ્વિક દરો પર જ નહીં, પરંતુ ડોલર-રૂપિયાના એક્સચેન્જ રેટ પર પણ નિર્ભર કરે છે. આજે રૂપિયો ડોલર સામે ₹91.10ના ઓલ-ટાઇમ લો પર છે. LKP સિક્યોરિટીઝના જતિન ત્રિવેદી અનુસાર, રૂપિયાની નબળાઈને કારણે આંતરરાષ્ટ્રીય સ્તરે ખરીદવામાં આવતા સોનાની લેન્ડિંગ કોસ્ટ ભારતમાં ખૂબ મોંઘી થઈ ગઈ છે, જેનાથી સ્થાનિક બજારમાં કિંમતો ₹1.5 લાખને પાર નીકળી ગઈ છે.
• સેન્ટ્રલ બેંકોની ભારે ખરીદી: વિશ્વભરની સેન્ટ્રલ બેંકો (જેમ કે ભારતની RBI) તેમના વિદેશી મુદ્રા ભંડારને સુરક્ષિત રાખવા માટે સોનાનો સ્ટોક વધારી રહી છે. વર્લ્ડ ગોલ્ડ કાઉન્સિલના આંકડા મુજબ, 2025માં રેકોર્ડ ખરીદી પછી 2026ની શરૂઆતમાં પણ સેન્ટ્રલ બેંકોની માગ મજબૂત બની રહી છે, જેના કારણે સપ્લાય ઓછી અને ડિમાન્ડ વધુ હોવાને કારણે કિંમતો વધી રહી છે.

₹1.80 લાખથી ₹1.90 લાખ સુધી: રિસર્ચ હેડ ડૉ. રેનિશા ચૈનાનીના મતે, જો અમેરિકી ટેરિફ અને મધ્ય પૂર્વમાં તણાવ વધે, તો સોનું 2026ના મધ્ય સુધીમાં ₹1,90,000ના સ્તરને સ્પર્શી શકે છે.

• ગયા વર્ષે એટલે કે 2025માં સોનાની કિંમત 57,033 રૂપિયા (75%) વધી છે. 31 ડિસેમ્બર 2024ના રોજ 10 ગ્રામ 24 કેરેટ સોનું 76,162 રૂપિયાનું હતું, જે 31 ડિસેમ્બર 2025ના રોજ 1,33,195 રૂપિયા થઈ ગયું.
• ચાંદીનો ભાવ પણ આ સમયગાળા દરમિયાન 1,44,403 રૂપિયા (167%) વધ્યો. 31 ડિસેમ્બર 2024ના રોજ એક કિલો ચાંદીની કિંમત 86,017 રૂપિયા હતી, જે આ વર્ષના છેલ્લા દિવસે 2,30,420 રૂપિયા પ્રતિ કિલો થઈ ગઈ.

ચાંદીમાં તેજીના 3 મુખ્ય કારણો

1. ઔદ્યોગિક માગ- સોલર, ઇલેક્ટ્રોનિક્સ અને EVમાં ભારે ઉપયોગ, ચાંદી હવે માત્ર જ્વેલરી નહીં, પણ જરૂરી કાચો માલ બની ગઈ છે.
2. ટ્રમ્પનો ટેરિફનો ડર- અમેરિકી કંપનીઓ ચાંદીનો મોટો સ્ટોક જમા કરી રહી છે, ગ્લોબલ સપ્લાયમાં ઘટાડાથી કિંમતો વધી.
3. ઉત્પાદકોની હોડમાં- ઉત્પાદન અટકવાના ડરથી બધા પહેલેથી જ ખરીદી રહ્યા છે, આ જ કારણોસર આવનારા મહિનાઓમાં પણ તેજી જળવાઈ રહેશે.