એપલ આ વર્ષે ઓછામાં ઓછા ત્રણ નવા ‘અલ્ટ્રા’ ડિવાઇસ લોન્ચ કરી શકે છે. એપલ દ્વારા હાલમાં જ Apple Watch SE, iPad 11 અને MacBook Neo જેવા પ્રોડક્ટ્સ રજૂ કરીને પોતાની પ્રોડક્ટ લાઇનમાં નવા ગેજેટ્સનો સમાવેશ કર્યો છે. જોકે હવે કંપની તેમની લાઇન-અપમાં હાઇ-એન્ડ એટલે કે ‘અલ્ટ્રા’ પ્રોડક્ટ્સનો સમાવેશ કરવા જઈ રહી છે. આ તમામ પ્રોડક્ટ્સ ખૂબ જ અદ્ભુત અને ફીચર્સથી ભરપૂર હોવાનું કહેવામાં આવી રહ્યું છે. તેમ જ એમાં AI નો પણ સમાવેશ કરવામાં આવશે.

‘અલ્ટ્રા’ લાઇનઅપમાં પહેલું ડિવાઇસ ફોલ્ડેબલ iPhone હોઈ શકે છે, જેની કિંમત લગભગ $2000 આસપાસ હોવાની ચર્ચા છે. આ ફોનમાં મોટું ઇનર ડિસ્પ્લે અને અન્ડર-ડિસ્પ્લે સેન્સર્સ હશે. આ મોબાઇલને ફોલ્ડેબલ નામ આપવામાં આવી શકે છે, પરંતુ કંપની હવે અલ્ટ્રા નામ આપવાનું વિચારી રહી છે. iPhone ની સાથે એપલ હવે AirPods Ultra પર પણ ધ્યાન આપી રહી છે. એપલના વર્તમાન AirPods Pro કરતાં એની વધુ કિંમત હશે અને કંપનીની પ્રોડક્ટ લાઇનમાં ટોચ પર રહેશે. આ નવા AirPods માં કમ્પ્યુટર-વિઝન કેમેરા હશે, જે Siri દ્વારા Visual Intelligence ડેટા પ્રોસેસ કરવા માટે ઉપયોગમાં લેવાશે.

‘અલ્ટ્રા’ લાઇનઅપમાં ત્રીજું ડિવાઇસ MacBook Ultra હોઈ શકે છે. આ નવા મશીનમાં ટચ-સપોર્ટેડ OLED ડિસ્પ્લે હશે, જેના કારણે તેની કુલ કિંમતમાં લગભગ 20% સુધી વધારો થઈ શકે છે. આ મોડલ અત્યારના M5 Pro અને M5 Max MacBook Pro કરતાં ઊંચું મોડલ હશે. જોકે આ મોડલ આવતાં જૂના મોડલને બંધ કરવામાં નહીં આવે. જોકે આ ‘અલ્ટ્રા’ નામનો ઉપયોગ કરવાના એંધાણ છે, પરંતુ એ પણ એટલી જ હકીકત છે કે એપલ એનો ઉપયોગ નહીં કરે કારણ કે તેમણે બજેટ MacBook માટે Neo નામનો ઉપયોગ કર્યો છે. આથી પ્રોડક્ટના લોન્ચ બાદ જ સાચું નામ જાણવા મળી શકે છે. ભવિષ્યમાં iPad અને Mac જેવી અન્ય પ્રોડક્ટ લાઇન પણ આ સુપર પ્રીમિયમ કેટેગરીમાં જઈ શકે છે. ભવિષ્યમાં એપલ મોટું ફોલ્ડેબલ OLED ડિસ્પ્લે ધરાવતું હાઈ-એન્ડ iPad બનાવી શકે છે જેને Mac સાથે સરખાવી શકાય છે. આ સાથે જ મોટા સ્ક્રીનવાળું અપગ્રેડેડ iMac પણ જોવા મળી શકે છે.