હવામાન વિભાગે જમ્મુ-કાશ્મીરમાં સોમવારથી હળવા વરસાદ અને હિમવર્ષાની આગાહી કરી છે. જ્યારે, સમગ્ર ખીણમાં મહત્તમ તાપમાન સિઝનની સરેરાશ કરતાં વધુ રહ્યું. હિમાચલ પ્રદેશમાં બે દિવસ હવામાન સ્વચ્છ રહેશે, અને 11 માર્ચથી રાજ્યમાં પશ્ચિમી વિક્ષોભ સક્રિય થશે. જેના કારણે વરસાદ અને હિમવર્ષાનો દોર શરૂ થવાની સંભાવના છે.

રાજસ્થાનમાં તાપમાન 40 ડિગ્રી સેલ્સિયસને પાર કરી ગયું. ઝુનઝુનુ જિલ્લાનું પિલાની રાજ્યમાં સૌથી ગરમ રહ્યું, જ્યાં મહત્તમ તાપમાન 40.2 ડિગ્રી સેલ્સિયસ નોંધાયું. ત્યારબાદ બાડમેરમાં 40 ડિગ્રી સેલ્સિયસ નોંધાયું. જ્યારે મધ્ય પ્રદેશમાં પણ તાપમાન 39 ડિગ્રી સેલ્સિયસની નજીક પહોંચી ગયું. અહીં રતલામનું તાપમાન 38.6 ડિગ્રી રહ્યું.

અહીં દેશની રાજધાની નવી દિલ્હીમાં પણ દિવસનું તાપમાન 35.6 ડિગ્રી સેલ્સિયસ પહોંચી ગયું. IMD એ સોમવારે આકાશમાં હળવા વાદળો છવાયેલા રહેવાની અને મહત્તમ તાપમાન 37 ડિગ્રી અને લઘુત્તમ તાપમાન 17 ડિગ્રી સેલ્સિયસની આસપાસ પહોંચવાની આગાહી કરી છે.

હવામાન વિભાગના જણાવ્યા અનુસાર, આ દિવસોમાં રાજસ્થાનના રણ પ્રદેશોમાંથી ગરમ પવનો આવી રહ્યા છે. જેની અસર મેદાની રાજ્યોમાં જોવા મળી રહી છે. પવનની દિશા ઉત્તર-પૂર્વથી હવે પશ્ચિમ અને ઉત્તર-પશ્ચિમ થઈ ગઈ છે. તે જ સમયે, હવામાં ભેજ ખૂબ ઓછો છે. જેના કારણે આગામી દિવસોમાં તાપમાન વધુ વધશે. આનાથી સૂર્યપ્રકાશની તીવ્રતા પણ વધી શકે છે.

હવામાન વિભાગના મતે, હીટવેવ ત્યારે ગણાય છે જ્યારે મેદાનોમાં તાપમાન 40 ડિગ્રી કે તેથી વધુ પહોંચી જાય. જો સામાન્ય તાપમાન કરતાં 4 થી 6 ડિગ્રી વધુ નોંધાય. આવી સ્થિતિમાં લોકોના સ્વાસ્થ્ય પર પણ અસર પડી શકે છે અને લૂ લાગવાનો ખતરો વધી જાય છે.