દિલ્હીમાં સુરક્ષા એજન્સીઓએ સોમવારે લશ્કર-એ-તૈયબા (Let) સાથે સંકળાયેલા આતંકવાદી શબ્બીર અહેમદ લોનને દિલ્હી બોર્ડર પરથી પકડ્યો. પોલીસના જણાવ્યા અનુસાર, પ્રારંભિક તપાસમાં સામે આવ્યું છે કે તે બાંગ્લાદેશમાંથી ભારત વિરોધી ગતિવિધિઓ કરી રહ્યો હતો.

પોલીસના જણાવ્યા અનુસાર, શબ્બીર દિલ્હી, કોલકાતા અને તમિલનાડુમાં આતંકવાદી ગતિવિધિઓ માટે યુવાનોની ભરતી કરવાની તૈયારીમાં હતો. આ આખું નેટવર્ક પાકિસ્તાનની ગુપ્તચર એજન્સી ISIના ઈશારે ઓપરેટ થઈ રહ્યું હતું.

વર્ષ 2007માં પણ દિલ્હી પોલીસે આતંકવાદના આરોપોમાં લોનને પકડ્યો હતો. 2019માં જામીન મળ્યા પછી તે બાંગ્લાદેશ ભાગી ગયો હતો.

કાઉન્ટર ઇન્ટેલિજન્સ કાશ્મીર (CIK) એ 26 માર્ચે શબ્બીરના આતંકવાદી મોડ્યુલની તપાસ માટે કાશ્મીરના ત્રણ જિલ્લાઓ, ગાંદરબલ, શોપિયાં અને શ્રીનગરના 10 ઠેકાણાઓ પર દરોડા પાડ્યા હતા.

CIK અનુસાર, આ કેસના તાર એક ટ્રાન્ઝેક્શનલ નેટવર્ક સાથે જોડાયેલા હોવાનું જણાયું છે, જેમાં મોડ્યુલને બાંગ્લાદેશ અને પાકિસ્તાનમાં બેઠેલા લશ્કર-એ-તૈયબાના હેન્ડલર્સ પાસેથી નિર્દેશો મળી રહ્યા હતા. સુરક્ષા એજન્સીઓ 2 મહિનાથી શબ્બીરની ગતિવિધિઓ પર નજર રાખી રહી હતી.

મોડ્યુલનો પર્દાફાશ દિલ્હી મેટ્રોમાં લાગેલા દેશ વિરોધી પોસ્ટરોથી થયો

• આ મોડ્યુલનો ખુલાસો 7 ફેબ્રુઆરીના રોજ દિલ્હીમાં લગાવવામાં આવેલા દેશ વિરોધી પોસ્ટરોથી થયો હતો. દિલ્હી સ્પેશિયલ સેલના વધારાના પોલીસ કમિશનર પ્રમોદ સિંહ કુશવાહાએ જણાવ્યું હતું કે કેટલાક લોકોએ કાશ્મીરી ગેટ બસ સ્ટેન્ડ અને મેટ્રો સ્ટેશન પાસે ‘ફ્રી કાશ્મીર’ના દેશ વિરોધી પોસ્ટરો લગાવ્યા હતા. CISFના જવાનોએ આ જોઈને મેટ્રો પોલીસને જાણ કરી. મેટ્રો પોલીસે કેસ નોંધી તપાસ શરૂ કરી.
• તપાસ દરમિયાન, મેટ્રો પોલીસે પોસ્ટર લગાવનારા 2 આરોપીઓના આવવા-જવાના રૂટ શોધી કાઢ્યા. પોસ્ટર લગાવ્યા પછી બંને કોલકાતા ભાગી ગયા હતા. બાદમાં 13 ફેબ્રુઆરીના રોજ કેસ સ્પેશિયલ સેલને ટ્રાન્સફર કરવામાં આવ્યો. ટીમ કોલકાતા પહોંચી. ત્યાં સ્થાનિક પોલીસના સહયોગથી સેલે ઉમર ફારૂક અને રબી-ઉલ-ઇસ્લામને પકડી પાડ્યા.
• પોલીસની પૂછપરછમાં બંનેએ કબૂલ્યું કે તેમણે બાંગ્લાદેશમાં બેઠેલા લશ્કરના હેન્ડલર શબ્બીર અહેમદ લોનના ઇશારે પોસ્ટરો લગાવ્યા હતા.
• આ પછી સુરક્ષા એજન્સીઓએ લગભગ 9 દિવસ સુધી કોલકાતા અને તમિલનાડુમાં દરોડા પાડીને એક બાંગ્લાદેશી સહિત કુલ 8 આતંકવાદીઓની ધરપકડ કરી છે. તેમની પાસેથી 12 મોબાઈલ ફોન અને 16 સિમ કાર્ડ જપ્ત કરવામાં આવ્યા છે.
• દિલ્હી પોલીસના જણાવ્યા અનુસાર, તમિલનાડુમાંથી ધરપકડ કરાયેલા 6 શંકાસ્પદ લોકો પર આતંકવાદીઓને મદદ કરવા માટે શહેરોની રેકી કરવાનો આરોપ છે. તમામને ટ્રેન દ્વારા દિલ્હી લાવવામાં આવ્યા હતા.