સરકારી તેલ કંપની ઇન્ડિયન ઓઇલ કોર્પોરેશન (IOCL) પાસે એક મહિનાથી વધુનો ક્રૂડ ઓઇલ સ્ટોક છે. કંપનીએ મંગળવારે જણાવ્યું કે અમેરિકા અને ઇરાન વચ્ચે ચાલી રહેલા તણાવ છતાં દેશમાં ક્રૂડ ઓઇલની કોઈ અછત નહીં થાય.

જોકે, હોર્મુઝ રૂટ બંધ થવાથી LPGના સ્ટોકમાં થોડો ઘટાડો થયો છે, પરંતુ સમગ્ર દેશમાં તેનો પુરવઠો વ્યવસ્થાપિત કરવામાં આવી રહ્યો છે. આ રૂટ સાથે ભારતનો 50% ઊર્જા પુરવઠો અને ખાડી દેશોમાંથી આવતો 90% LPG પુરવઠો જોડાયેલો છે, જે હાલમાં અવરોધિત છે.

જ્યારે, કંપનીનો નફો નાણાકીય વર્ષ 2025-26ના ચોથા ક્વાર્ટર (Q4FY26)માં 81% વધ્યો છે. તે વધીને ₹15,176.08 કરોડ પર પહોંચી ગયો, જે ગયા વર્ષના સમાન ક્વાર્ટરમાં ₹8,367.63 કરોડ હતો.

IOCLના ડાયરેક્ટર ફાઇનાન્સ અનુજ જૈને જણાવ્યું હતું કે, “ક્રૂડ ઓઇલ અને અન્ય પેટ્રોલિયમ પ્રોડક્ટ્સના સપ્લાય માટે અમારી પાસે ઘણા અલગ-અલગ સ્રોત ઉપલબ્ધ છે. જ્યારથી મિડલ ઇસ્ટમાં વિવાદ શરૂ થયો છે, ત્યારથી અમારી તમામ રિફાઇનરીઓ સંપૂર્ણ ક્ષમતા પર કામ કરી રહી છે.”

તેમણે સ્વીકાર્યું કે LPGના સપ્લાયમાં કેટલીક અડચણો આવી હતી, પરંતુ કંપનીએ LPG આયાતના સ્રોત બદલી નાખ્યા છે. ખાડી દેશોમાંથી ગેસ સપ્લાય પ્રભાવિત થયા પછી IOCએ ઇન્ડોનેશિયા, નાઇજીરીયા, અંગોલા અને ઓમાન જેવા દેશોમાંથી સ્પોટ પ્રોક્યોરમેન્ટ (તાત્કાલિક ખરીદી) શરૂ કરી દીધી છે, જેનાથી દેશભરમાં પર્યાપ્ત LPG પહોંચી રહ્યું છે.

હોર્મુઝ રૂટ ઓમાનના અખાત અને ફારસના અખાત વચ્ચે સ્થિત દુનિયાનો સૌથી મહત્વપૂર્ણ અને સંવેદનશીલ દરિયાઈ જળમાર્ગ છે. દુનિયાભરમાં થતા કુલ ક્રૂડ ઓઇલના વેપારનો લગભગ 20% આ જ સાંકડા રસ્તા પરથી પસાર થાય છે.

IOCLએ સોમવારે તેના નાણાકીય પરિણામો જાહેર કર્યા. તે મુજબ, નાણાકીય વર્ષ 2025-26ના ચોથા ક્વાર્ટરમાં (Q4FY26) કંપનીનો કન્સોલિડેટેડ નેટ પ્રોફિટ (ચોખ્ખો નફો) 81% વધીને ₹15,176.08 કરોડ પર પહોંચી ગયો છે. આના અગાઉના નાણાકીય વર્ષના સમાન ક્વાર્ટરમાં કંપનીને ₹8,367.63 કરોડનો નફો થયો હતો.

નફાની સાથે જ કંપનીના બોર્ડે નાણાકીય વર્ષ 2025-26 માટે 12.5%ના અંતિમ ડિવિડન્ડની ભલામણ કરી છે. આ અંતર્ગત શેરધારકોને ₹10ની ફેસ વેલ્યુવાળા દરેક ઇક્વિટી શેર પર ₹1.25નું ડિવિડન્ડ આપવામાં આવશે. જોકે, આ માટે આગામી વાર્ષિક સામાન્ય સભા (AGM)માં શેરધારકોની મંજૂરી મળવી બાકી છે.

ચાલુ નાણાકીય વર્ષ 2026-27 માટે IOCએ ₹32,700 કરોડના કેપેક્સનો પ્લાન તૈયાર કર્યો છે. ગત નાણાકીય વર્ષ 2025-26માં આ ખર્ચ ₹31,401 કરોડ હતો. કંપની પોતાની રિફાઇનરીઓની ક્ષમતા વધારવા પર ઝડપથી કામ કરી રહી છે.