મીરાબાઈ ચાનુએ કોમનવેલ્થ ગેમ્સ 2026માં ભારતને પહેલો ગોલ્ડ મેડલ અપાવી દીધો છે. તેમણે વુમન્સ 49KG વેટલિફ્ટિંગ કોમ્પિટિશનમાં 190 KG (85 kg સ્નેચ + 105 kg ક્લીન એન્ડ જર્ક) ઊંચકીને મેડલ પોતાના નામે કર્યો.

આ સાથે જ ભારતના હવે 3 મેડલ (1 ગોલ્ડ, 1 સિલ્વર અને 1 બ્રોન્ઝ) થઈ ગયા છે. આ પહેલા રવિવારે ઋષિકાંત સિંહે મેન્સ 60 kg કેટેગરીમાં સિલ્વર અને શુક્રવારે ઝંડુ કુમારે પેરા પાવરલિફ્ટિંગમાં બ્રોન્ઝ મેડલ જીત્યો હતો. ભારત હવે મેડલ ટેલીમાં સાતમા સ્થાને પહોંચી ગયું છે. ઓસ્ટ્રેલિયા 12 ગોલ્ડ સહિત 23 મેડલ સાથે ટોપ પર બનેલું છે.

આ ઋષિકાંત સિંહની બીજી કોમનવેલ્થ ગેમ્સ છે. આ પહેલા તેમણે બર્મિંગહામ 2022માં 55kg કેટેગરીમાં ભારતનું પ્રતિનિધિત્વ કર્યું હતું. ગ્લાસગોમાં તેઓ પહેલીવાર 60kg કેટેગરીમાં ઉતર્યા. તેઓ વર્તમાન કોમનવેલ્થ વેઈટલિફ્ટિંગ ચેમ્પિયનશિપના ચેમ્પિયન પણ છે.

મણિપુર વેઈટલિફ્ટિંગ એસોસિએશનના સેક્રેટરી અને ઋષિકાંત સિંહના શરૂઆતી કોચ બ્રોજેન્દ્ર સિંહે જણાવ્યું કે ઋષિકાંતે 2009માં મણિપુર સ્પોર્ટ્સ એકેડમીથી વેઈટલિફ્ટિંગની શરૂઆત કરી હતી. ત્યારબાદ તેમની પસંદગી સ્પોર્ટ્સ ઓથોરિટી ઓફ ઇન્ડિયા (SAI)ના સેન્ટરમાં થઈ. બાદમાં તેઓ ભારતીય નૌકાદળ સાથે જોડાયા અને ત્યાં ટ્રેનિંગ લીધા પછી ભારતીય સેનાના સ્પોર્ટ્સ સેટ-અપનો ભાગ બન્યા.

બ્રોજેન્દ્ર સિંહે જણાવ્યું કે ઋષિકાંતના પરિવારમાં બે ભાઈઓ છે. તેમના મોટા ભાઈ ભારતીય સેનામાં છે. ઋષિકાંત મણિપુરના ઇમ્ફાલ વેસ્ટના રહેવાસી છે.

ભારતને વુમન્સ પેયર્સ લૉન બૉલ્સમાં નામિબિયા સામે ટાઈ-બ્રેકમાં હારનો સામનો કરવો પડ્યો. ટીમને સેમિફાઈનલમાં પહોંચવા માટે ઇંગ્લેન્ડને હરાવવું પડશે. રૂપા રાની તિર્કી અને પિંકી સિંહની જોડી માટે આ મુકાબલો કરો યા મરોનો હશે. ઇંગ્લેન્ડ સામે જીત નોંધાવવા પર ભારતીય જોડી સેમિફાઈનલમાં સ્થાન મેળવી લેશે અને મેડલની આશાઓ અકબંધ રહેશે.

જિમ્નાસ્ટિક્સમાં સાંજે 4:30 વાગ્યે યોગેશ્વર સિંહ અને તપન મોહંતી પુરુષ ઓલ-અરાઉન્ડ ફાઇનલ રમશે. જ્યારે રાત્રે 10:30 વાગ્યે મહિલા ઓલ-અરાઉન્ડ ફાઇનલ યોજાશે. તેમાં ભારતીય ખેલાડીઓ ક્વોલિફાય થવા પર ઉતરશે.

લૉન બૉલ્સમાં બપોરે 1 વાગ્યે રૂપા રાણી તિર્કી અને પિંકી સિંહની જોડી મહિલા પેયર્સ સેક્શનલ પ્લેમાં નામિબિયા સામે ટકરાશે. જ્યારે સાંજે 7:15 વાગ્યે પુતુલ સોનોવાલ પુરુષ સિંગલ્સ સેક્શનલ પ્લેમાં માલ્ટાના શૉન જેમ્સ પાર્નિસનો સામનો કરશે.

સ્વિમિંગમાં સાંજે 4:39 વાગ્યે શ્રીહરિ નટરાજ, આર્યન નેહરા, અનીશ ગૌડા અને ધાક્ષણ શશિકુમાર પુરુષ 4×200 મીટર ફ્રીસ્ટાઇલ રિલે હીટ્સમાં ઉતરશે. ક્વોલિફાય થવા પર ભારતીય ટીમ રાત્રે 1:56 વાગ્યે ફાઇનલ રમશે. આ મુકાબલો ભારતીય સમય અનુસાર 27 જુલાઈએ થશે.

બોક્સિંગમાં રાત્રે 10:45 વાગ્યે પ્રીતિ પવાર મહિલા 54 કિગ્રા કેટેગરીના રાઉન્ડ ઓફ-16માં મલાવીની ડેબોરા મટેન્જે સામે ટકરાશે. ત્યારબાદ રાત્રે 11:45 વાગ્યે જદુમણિ સિંહ પુરુષ 55 કિગ્રા કેટેગરીના રાઉન્ડ ઓફ-16માં પાકિસ્તાનના બોક્સરનો સામનો કરશે. 27 જુલાઈએ રાત્રે 12:45 વાગ્યે આદિત્ય પ્રતાપ યાદવ પુરુષ 65 કિગ્રા કેટેગરીના રાઉન્ડ ઓફ-16માં યુગાન્ડાના બોક્સર સામે ઉતરશે.